2 րոպեի ընթերցում
ԵՐԵՎԱՆ, 11 ՓԵՏՐՎԱՐԻ, ԱՐՄԵՆՊՐԵՍ:Մատենագետ, պատմագետ Արտաշես Տեր-Խաչատուրյանի որդիները`Տարոն և Զարեհ Տեր-Խաչատուրյանները, իրենց հոր թողած գրքերի հավաքածուի քառասուներեք յուրօրինակ ու բացառիկ նմուշներ նվիրեցին Հայաստանի ազգային գրադարանին:
«Հայրս բանասեր էր, բանահավաք, դասախոս, հայագիտության մասնագետ և իր աշխատությունների կողքին ունեցել է հնատիպ ու արժեքավոր գրքերի հսկայական հավաքածու: Քառասուներկուսը նոյեմբերին ենք նվիրել գրադարանին, ևս քառասուներքը`այսօր»,-«Արմենպրես»-ի հաղորդմամբ` փետրվարի 11-ին լրագրողների հետ զրույցում ասաց Տարոն Տեր-Խաչատուրյանը:
Ազգային գրադարանի տնօրեն Հրաչյա Սարիբեկյանն էլ շեշտեց, որ, թերթելով գրքերը, հասկացել է, թե ինչպես է Արտաշես Տեր-Խաչատուրյանը հոգ տարել դրանց մասին: «Յուրաքանչյուր գրքի վրա նշում կա: Եթե անթվագիր է, ասվում է, թե որ թվականի կարող էր այն լինել, ում է պատկանել և այլն: Կարծեցի, որ տարբեր ֆոնդերում այս գրքերը կարող են մոռացվել: Գրադարանի Անհատական հավաքածուների և նվիրատվությունների ենթաբաժնում ստեղծել ենք Արտաշես Տեր-Խաչատուրյանի անհատական հավաքածու, որտեղ կպահվեն այս գրքերը»,-նշեց նա:
Սարիբեկյանի խոսքով` եղբայրները բերել են Նոր կտակարանի նմուշներ, Աստվածաշունչ, որոնցից գրադարանը ընդամենը մեկ օրինակ ունի: «Շատ արժեքավոր է Աբդուլ Համիդի մասին ֆրանսերեն գիրքը, Դանիել Վարուժանի «Հացին երգը» ժողովածուի առաջին հրատարակությունը, «Նարեկ»-ի` 1851 թվականի հրատարակությունը, Արշակ Ալպոյաջյանի գրքերից կա հենց նրա ինքնագրով»,-ներկայացրեց տնօրենը:
Նա շեշտեց, որ գրադարանում ինքնագրերի հավաքածու ունեն, որտեղ կպահվեն նաև նոր գրքերը: