2 րոպեի ընթերցում
ԵՐԵՎԱՆ, 25 ԴԵԿՏԵՄԲԵՐԻ, ԱՐՄԵՆՊՐԵՍ: ՀՀ վարչապետի աշխատակազմի Ազգային փոքրամասնությունների և կրոնի հարցերի բաժնի դահլիճում տեղի ունեցավ «Եզդիների գարուն» գրքի շնորհանդեսը:
«Արմենպրես»-ի փոխանցմամբ` գիրքն ամբողջովին եզդիերեն է, և եզդի ու հայ հեղինակների առաջին համատեղ ժողովածուն է, որ հանձնվում է ընթերցողի դատին:
Ազգային փոքրամասնությունների և կրոնի հարցերի բաժնի պետ Վարդան Ասցատրյանը մեզ հետ զրույցում նշեց, որ գրքում ներառված են 16 եզդի և 3 հայ հեղինակի ստեղծագործություններ:
«Այսօր տեղի է ունենում մի գրքի շնորհանդեսը, որում ներառված են եզդի 16 հեղինակներ, ինչպես նաև երեք հայ հեղինակ, որոնք թարգմանվել են եզդիերեն: Գիրքն ամբողջովին եզդիերեն է: Այն կարևոր է նրանով, որ, փաստորեն, ներկայացվում է եզդիական մշակույթը, այս դեպքում` եզդիական գրականության տեսքով»,- ասաց Ասցատրյանը:
Համահայկական գրողների միության Եզդի գրողների բաժանմունքի նախագահ Հասան Թամոյանը հույս հայտնեց, որ այս ժողովածուն վերջինը չի լինի:
«Այս ժողովածուն իր ազդեցությունը կունենա մեր լեզվի պահպանման և զարգացման, ինչպես նաև հայ-եզդիական եղբայրության ավելի ամրապնդման գործում: Այն, որ այսօր մենք ականատես ենք եզդի ստեղծագործողների առաջին և, հուսով եմ, ոչ վերջին ժողովածուի շնորհանդեսին, Ազիզ Թամոյանի գլխավորած պայքարի արդյունքն է»,- նշեց Հասան Թամոյանը:
«Եզդիների գարուն» ժողովածուն հրատարակվել է Համահայկական գրողների միության վարչության նախագահի ֆինանսական աջակցությամբ: