ԵՄ առաքելությունն ի սկզբանե չի բացառել Ներքին Հանդ հասնելու հետ կապված խնդիրները
ԵՐԵՎԱՆ, 21 ՀՈԿՏԵՄԲԵՐԻ, ԱՐՄԵՆՊՐԵՍ: Հայաստանում Եվրամիության քաղաքացիական առաքելությունն ի սկզբանե չի բացառել, որ Ներքին Հանդ հասնելու հետ կապված կարող են խնդիրներ լինել:
«Արմենպրես»-ի փոխանցմամբ՝ այս մասին ասաց Հայաստանում ԵՄ քաղաքացիական առաքելության ղեկավար Մարկուս Ռիտերը Հայաստանում ԵՄ դիտորդական առաքելության 1-ամյա տարեդարձի շրջանակում կազմակերպված ասուլիսում՝ անդրադառնալով ադրբեջանական վերջին ագրեսիայի ժամանակ ռուս սահմանապահների կողմից ԵՄ առաքելության մուտքը Ներքին Հանդ խոչընդոտելու վերաբերյալ հարցին:
«Մեր առաքելությունը հասանելիություն ունի Հայաստանի ամբողջ տարածքում՝ բացառությամբ Ներքին Հանդի տարածքի, որը ռուս սահմանապահների պատասխանատվության ներքո է: Ի սկզբանե մենք գիտեինք, որ չեն բացառվում խնդիրները Ներքին Հանդ հասնելու համար»,-ասաց Ռիտերը:
Թե որն է ԵՄ դիտորդների մուտքը խոչընդոտելու հիմնավորումը, նա հորդորում է հարցնել ռուսական կողմին:
Առաքելության ղեկավարն ընդգծեց՝ իրենք Հայաստանում հյուրի կարգավիճակով են: «Ըստ այդմ էլ Հայաստանը պետք է զբաղվի այդ հարցով, մենք ուղղակի շփումներ չունենք Հայաստանում ռուսական ուժերի հետ»,-ասաց Ռիտերը:
Նա վստահեցրեց, որ խնդիրը կապված է բացառապես Ներքին Հանդի հետ, մնացած այն տեղերում, որտեղ իրենք հանդիպում են ռուսական ուժերի հետ, խնդիրներ չեն լինում:
Ադրբեջանը փետրվարի 13-ի առավոտից մի քանի ժամ կրակ էր բացել Սյունիքի մարզի Ներքին Հանդ բնակավայրի հատվածում տեղակայված հայկական դիրքերի ուղղությամբ, ինչի հետևանքով Հայաստանն ունի 4 զոհ և 1 վիրավոր։
Հայաստանի անվտանգության խորհրդի քարտուղար Արմեն Գրիգորյանը հայտնել է, որ հայկական կողմը տեղյակ է, որ ՌԴ սահմանապահները խոչընդոտել են ԵՄ դիտորդների մուտքը Ներքին Հանդ, և այդ հարցն արդեն հասցեագրել է։
Բաժանորդագրվեք մեր ալիքին Telegram-ում