«Նոր գիրք»-21/24. Ազնավուր, Մոնթգոմերի,Մունիե

ԵՐԵՎԱՆ, 27 ՄԱՅԻՍԻ, ԱՐՄԵՆՊՐԵՍ: «Արմենպրես»լրատվական գործակալությունը ներկայացնում է իր հեղինակային «Նոր գիրք» նախագիծը: Այն ամեն երկուշաբթի ընթերցողի դատին է հանձնում հայաստանյան հրատարակչությունների լույս ընծայած գրքերը: Գործակալության էջերում ընթերցասերները հնարավորություն ունեն տեղեկատվություն ստանալ նոր գրքերի մասին, ծանոթանալ դասական գործերին և արդի գրականության զարգացման միտումներին: Այս շաբաթ«Արմենպրես»-ն առանձնացրել է 2024 թվականին հրատարակված և հանրության դատին հանձնված տարբեր հրատարակչությունների ուշագրավ գրքեր՝ տարբեր խորագրերի ներքո:

Թարգմանական գրականություն

Շառլ Ազնավուր, Ազնավուր. երկերի ժողովածու

ՀԱՏՈՐ 1 / ԱՐՁԱԿ - Շառլ Ազնավուրի արձակ ստեղծագործությունների այս լիակատար հատորը ներառում է նրա 5 ինքնակենսագրական գործերը և պատմվածքների ժողովածուն, որոնք հրատարակել է Newmag-ը (2019-2023): Իր հուշերում Ազնավուրն անկեղծորեն խոսում է ընտանիքի, անցյալի ու կարիերայի դժվարությունների, պատմում կյանքի դասերի ու ճակատագրի հեգնանքի մասին: Պատասխանում է իր անողոք քննադատների ու դեղին մամուլի մեղադրանքներին։ Ժամանակակից արվեստն ինչո՞ւ է կանխատեսելի, հեռուստատեսությունը՝ մակերեսային, շոու բիզնեսը՝ գռեհիկ․ նա բարձրացնում է ամենաարդիական հարցերը և ուղղորդում երիտասարդ արտիստներին։ Այստեղ են նաև մաեստրոյի 16 նովելները՝ գրված իրեն հատուկ հումորով և երևակայությամբ: Հայաստան, բոհեմ, սերեր, ընկերներ, Հոլիվուդ. ինչի մասին էլ Ազնավուրը պատմի, միշտ անկեղծ է ու շիտակ, համեստ ու հանդուրժող։

ՀԱՏՈՐ 2 / ՊՈԵԶԻԱ - Պոեզիայի այս ժողովածուն ամփոփում է մաեստրոյի պոեզիայի չորս հատորները՝ «Նոր երկիր», «Սեր և պատերազմ», «Քեզ համար, Հայաստան», «Ես չեմ հեռանում․․․», որոնք հրատարակվել են առանձին գրքերով: Այս ստեղծագործությունների մի մասը նրան հաջողություն է բերել, որոշները մեծ աղմուկ են բարձրացրել, որոշներն էլ ստիպել են կատարելագործել սեփական ոճն ու մուտք գործել գրական աշխարհ: Կիրք, սեր, դավաճանություն, նվիրում, բաժանում, ինքնասպանություն, խաբեություն, խաղամոլություն, ապաշխարում, զրույց Աստծո հետ. Ազնավուրի գրչի համար փակ թեմաներ չկան։ Հավաքածուն լույս է ընծայել Newmag-ը:

Մանկապատանեկան գրականություն

Լուսի Մոդ Մոնթգոմերի, «Աննան Արքայազնի կղզում»

Կանադացի վիպասանուհի Լուսի Մոդ Մոնթգոմերիի՝ 1915-ին լույս տեսած «Աննան Արքայազնի կղզում» վեպը հայ ընթերցողին է ներկայացնում արդեն վաղուց հայտնի («Աննան Կանաչ կտուրներից», «Աննան Ավոնլեայում») կարմրահեր ու երազկոտ աղջկա՝ Աննա Շիրլիի կյանքի նոր պատմությունը:

Գրական այս հրաշալի կերպարը, որը վաղուց հասցրել է գրավել բազում ընթերցողների սրտերը, ներկայանում է նոր լույսի տակ. Աննան արդեն ուսանողուհի է և համալսարանական կրթության հետ մեկտեղ ուսանում է նաև կյանքի դասերը: Նա կատարում է նաև գրական փորձեր, որտեղ, ինչպես և ամենուրեք, ուրախությունն ու հիասթափությունը հաջորդում են միմյանց:

Աղջիկը տառապում է երազանքների և իրականության դաժան բախումից: Նա անցնում է մանկության տխուր ճամփաներով, ապրում դասընկերուհու կորստի պատճառած ցավը և բացահայտում է իրական սիրո տվայտանքները: Այդուհանդերձ, Աննան պահպանում է իր անաղարտ երազանքներն ու վերջիվերջո ձեռք բերում ամենից կարևորը՝ անդավաճան և մաքուր սերը: Թարգմանությունը՝ Հայկանուշ Շարուրյանի։ Գիրքը լույս է ընծայել «Էդիթ Պրինտ»-ը:

Փաստավավերագրական գրականություն

Ֆրեդերիկ Մունիե, «Պապը, որ ուզում էր փոխել եկեղեցին»

Անվերապահ հավատ, տարակուսանք, կոշտ քննադատություն... Հռոմի Ֆրանցիսկ պապը տարբեր հույզեր է արթնացրել մարդկանց մեջ: Նրա ազատամիտ գաղափարները անհանգստացրել են Կաթոլիկ եկեղեցու բազմաբարդ կառույցներին և Վատիկանի ներսում բուն դրած խմբավորումներին, որոնք ծաղկում էին նախորդների օրոք... Մինչ պապի՝ մոտալուտ հրաժարականի մասին իրարամերժ լուրեր են պտտվում, ներկայացնենք այն մարդու դիմանկարը, որը մտադիր էր փոխել Կաթոլիկ եկեղեցին:

Վատիկանում իրականացված լրագրողական հետաքննության վրա հիմնված կենսագրական գիրքը պատմում է Հռոմի Ֆրանցիսկ պապի հովվապետության առաջին յոթ տարիների մասին՝ լույս սփռելով այն դժվարությունների, ներքին կատաղի դիմադրության վրա, որոնց բախվել է պապը, որը երազում էր արդիական ոգով բարեփոխելով՝ փրկել Եկեղեցին: Թարգմանությունը ֆրանսերենից՝ Նաիրա Մանուկյանի։ Խմբագիր՝ Մարգարիտ Առաքելյան։ Գիրքը լույս է ընծայել «Անտարես»-ը:

«Նոր գիրք»-ը ներկայացրեց Ռոզա Գրիգորյանը