ԵՐԵՎԱՆ, 17 ՀՈՒՆԻՍԻ, ԱՐՄԵՆՊՐԵՍ: «Արմենպրես» լրատվական գործակալությունը ներկայացնում է իր հեղինակային «Նոր գիրք» նախագիծը: Այն ամեն երկուշաբթի ընթերցողի դատին է հանձնում հայաստանյան հրատարակչությունների լույս ընծայած գրքերը: Գործակալության էջերում ընթերցասերները հնարավորություն ունեն տեղեկատվություն ստանալ նոր գրքերի մասին, ծանոթանալ դասական գործերին և արդի գրականության զարգացման միտումներին:
Այս շաբաթ «Արմենպրես»-ն առանձնացրել է 2024 թվականին հրատարակված և հանրության դատին հանձնված տարբեր հրատարակչությունների ուշագրավ գրքեր՝ տարբեր խորագրերի ներքո:
Հայ գրականություն. Գրիգոր Քեշիշյան, «Քեզնից հեռու, քեզ հետ»
Սիրո, հայրենասիրության, հայրենադարձության դժվար ու լուսավոր կողմերի մասին «Քեզնից հեռու, քեզ հետ» վիպակը 1940-ականներին Լիբանանից հայրենադարձված Գրիգոր Քեշիշյանի զգացմունքների ամփոփումն է մի գեղեցիկ սիրո պատմության տեսքով։ Վիպակը նամակների ժողովածու է, որ հայրենադարձման իր հերթին սպասող Սամվելը գրում է արդեն հայրենի հողի վրա ապրելու երազանքին հասած իր սիրելիին։ Բաժանումը ծանր վերք է բացում սիրելիների սրտերում, իսկ վերամիավորման սպասումը՝ բացահայտում նրանց ճակատագրի անսպասելի ոլորանները։ «Քեզնից հեռու, քեզ հետ» վիպակը լույս է տեսել ԽՍՀՄ տարիներին, իսկ այժմ վերահրատարակվել է «ԴաՎինչի» հրատարակչության կողմից։ Գրքի էջերում կգտնեք սիրո մասին բազմաթիվ՝ արդեն իսկ հայտնի աֆորիզմներ դարձած մտքեր։
Թարգմանական գրականություն. Ագաթա Քրիստի, «Ժամացույցները»
Խորհրդավոր մի սպանություն՝ լի այնքան տարօրինակ դրվագներով, որ թվում է, թե շատ ծանր հետաքննություն է սպասվում: Լուսիններ, կիսալուսիններ, ժամացույցներով լի մի սենյակ, գետնին փռված անշունչ մարմին, կույր տանտիրուհի և մի երիտասարդ սղագրուհի, որ ակամայից հայտնվում է խճճված պատմության կիզակետում: Մինչդեռ Էրքյուլ Պուարոն պնդում է, որ իրականում ամեն ինչ շատ պարզ է. ընդամենը մարդկանց հետ զրուցել է պետք, քանի որ սովորական խոսակցության ընթացքում են բացահայտվում էական մանրուքները:
«Դետեկտիվի թագուհի» Ագաթա Քրիստիի պատկերավոր սպանությունների առեղծվածները տասնամյակներ շարունակ հետապնդել են ընթերցողներին: Նրա գրքերը հրատարակվել են ավելի քան 2 միլիարդ տպաքանակով և թարգմանվել են աշխարհի շուրջ 100 լեզուներով: Ագաթա Քրիստին գրանցված է Գինեսի համաշխարհային ռեկորդների գրքում՝ որպես բոլոր ժամանակների ամենավաճառված վիպագիրը: Նա նաև աշխարհի ամենաշատ թարգմանված հեղինակն է՝ առաջ անցնելով Ժյուլ Վեռնից և Ուիլյամ Շեքսպիրից: Բոլոր ժամանակների ամենախորհրդավոր պատմություններն ու կերպարները կերտած այս բրիտանացի վիպասանը աշխարհին նմանը չունեցող ժառանգություն է թողել: Թարգմանությունը՝ Նաիրա Քերոբյանի։ Գիրքը լույս է ընծայել «Էդիթ Պրինտ»-ը:
Մանկապատանեկան գրականություն. Սեբաստիեն Պերեզ, Բենժամեն Լակոմբ, «Աշխարհի ամենալավ մայրիկը»
Մենք բոլորս էլ մայրիկ ունենք: Նա է մեզ համար հոգ տանում, երբ լավ չենք զգում, վատ եղանակին ստիպում է տաք հագնվել: Բայց ո՞վ է մայրիկը, և ինչ է նշանակում մայրիկ լինել: Ահա պարզագույն մի հարց, որը, սակայն, ունի նույնքան պատասխաններ, որքան գոյություն ունեն երեխա դաստիարակելու եղանակներ: Բնության մեջ անթիվ-անհամար մայրիկներ կան: Ո՞ւմ կարելի է ամենալավ մայրիկը համարել: Եղնի՞կ մայրիկին, կկո՞ւ մայրիկին, թե՞ մարդ մայրիկին: Արդյոք նրանք միևնույն կե՞րպ են իրենց բալիկներին մեծացնում: Եթե ո՛չ, ապա իսկապես ո՞վ է աշխարհի ամենալավ մայրիկը: Թարգմանությունը՝ Թագուհի Բլբուլյանի։ Գիրքը լույս է ընծայել «Զանգակ»-ը:
Փաստավավերագրական գրականություն. Եվգենի Չեռնյակ, «BIG MONEY. Առաջամարտիկների սկզբունքները»
Այս գիրքն այն մարդկանց մասին է, որոնք միշտ հնարավորություններ են փնտրում և գտնում դրանք: Աշխարհում բոլոր լավ բաները հորինել են մարդիկ, որոնք ցանկանում են փող աշխատել: Այս գիրքը ձեռնարկատերերի և գործարարների մասին Է, որոնք ամեն օր ավելի լավն են դարձնում այս աշխարհը՝ զարգացնելով իրենց բիզնեսը, ստեղծելով աշխատատեղեր և վճարելով հարկեր: Հակառակ կարծրատիպերի, նրանք ոչ թե ձանձրալի, մռայլ կապիտալիստներ են, որոնք մտածում են միայն փողի մասին, այլ հետաքրքիր, խելացի, խարիզմատիկ մարդիկ, որոնք մեզ պես ամեն օր հաջողության կարիք ունեն և ափսոսում են, որ դրա համար միշտ Ժամանակը չի բավականացնում: Միակ տարբերությունն այն է, որ նրանք բոլորը պերֆեկցիոնիստներ են՝ տարված իրենց գաղափարով: Հենց նրանց է պատկանելու ապագայի աշխարհը: Թարգմանությունը ն ծանոթագրությունները՝ Գոհար Քալաշյանի։ Գիրքը լույս է ընծայել «Անտարես»-ը:
«Նոր գիրք»-ը ներկայացրեց Ռոզա Գրիգորյանը