სომხეთის საგარეო საქმეთა სამინისტრო თურქეთის მიერ სომხეთთან ორმხრივ ვაჭრობაზე აკრძალვების მოხსნას მნიშვნელოვან ნაბიჯად მიიჩნევს
2 წუთი კითხვის
სომხეთის რესპუბლიკის საგარეო საქმეთა სამინისტროს პრესსპიკერი ანი ბადალიანი თურქეთის მიერ სომხეთთან ორმხრივი ვაჭრობის განხორციელებაზე აკრძალვების მოხსნას გამოეხმაურა და ხაზგასმით აღნიშნა, რომ ეს მნიშვნელოვანი ნაბიჯია ორ ქვეყანას შორის სრულფასოვანი და ნორმალური ურთიერთობების განვითარების გზაზე.
„არმენპრესის“ ცნობით, პრესსპიკერმა ამის შესახებ სოციალურ ქსელ „ფეისბუქის“ საკუთარ გვერდზე დაწერა.
„მივესალმებით თურქეთის გადაწყვეტილებას სომხეთის რესპუბლიკასთან ორმხრივი ვაჭრობის განხორციელებაზე აკრძალვების მოხსნის შესახებ, რაც სომხეთსა და თურქეთს შორის ურთიერთობების მოწესრიგების პროცესის მორიგი შედეგია.
ეს გადაწყვეტილება არსებითია ორ ქვეყანას შორის ვაჭრობისა და ბიზნეს წრეებს შორის კავშირების გაფართოების, რეგიონში ეკონომიკური კავშირურთიერთობის სტიმულირებისა და მშვიდობისა და კეთილდღეობის უზრუნველყოფის თვალსაზრისით.
ხაზგასმით აღვნიშნავთ, რომ ეს არის მნიშვნელოვანი ნაბიჯი ორ ქვეყანას შორის სრულფასოვანი და ნორმალური ურთიერთობების განვითარების მიმართულებით“, - დაწერა პრესსპიკერმა და დასძინა, რომ ამას შეიძლება მოჰყვეს ლოგიკური გაგრძელება სომხეთი-თურქეთის საზღვრის გახსნისა და დიპლომატიური ურთიერთობების დამყარების გზით.
უფრო ადრე თურქეთის საგარეო საქმეთა სამინისტრომ განაცხადა, რომ სომხეთთან პირდაპირი ვაჭრობის დასაწყებად მოსამზადებელი სამუშაოები დასრულებულია.