სომხეთის მიზანია, სომხური წარმოშობის პროდუქციის ექსპორტი ყველა ძირითად ბაზარზე გაზარდოს - გევორგ პაპოიანი
2 წუთი კითხვის

სომხეთის მიზანია, 2027 წელს გაზარდოს სომხური წარმოშობის პროდუქციის ექსპორტი ევროკავშირში, ევრაზიულ ეკონომიკურ კავშირში (ეეკ), აშშ-ში, ახლო აღმოსავლეთში, ჩინეთში, ინდოეთსა და სხვა ბაზრებზე.
„არ არსებობს არცერთი ეკონომიკური ზონა - დაწყებული ჩვენი უშუალო მეზობლებიდან - სადაც ექსპორტის მოცულობის გაზრდა არ გვქონდეს მიზნად დასახული. ჩემი მიზანი, როგორც სომხეთის რესპუბლიკის ეკონომიკის მინისტრის, არის სომხეთის საექსპორტო მოცულობების გაზრდა როგორც ევროკავშირის, ისე ევრაზიული ეკონომიკური კავშირისა და ახლო აღმოსავლეთის ბაზრებზე. ვინ თქვა, რომ ევრაზიული კავშირის ევროკავშირით ჩანაცვლება გვსურს? ჩვენ გვინდა მეტი გავყიდოთ როგორც ევროკავშირში, ასევე ევრაზიულ კავშირში“, - „არმენპრესის“ ცნობით, ამის შესახებ ეროვნულ ასამბლეაში ჟურნალისტებთან გამართულ ბრიფინგზე ეკონომიკის მინისტრმა გევორგ პაპოიანმა განაცხადა.
მინისტრმა აღნიშნა, რომ გასაღების ბაზრის მიუხედავად, სომხური პროდუქცია ხარისხობრივ მოთხოვნებს უნდა აკმაყოფილებდეს. „ხოლო ვინ თქვა, რომ ხარისხიანი საქონელი ევროპელებისთვის, რუსებისთვის, არაბული და ჩინური ბაზრებისთვის უნდა ვაწარმოოთ, ხოლო რაც დარჩება - სომხურ ბაზარს ერგოს? სომხური ბაზარი უკვე საკმაოდ გადახდისუნარიანია, ჩვენი მოსახლეობის მოთხოვნები პროდუქციის მიმართ კი ძალიან მაღალია. საქმე ისე არ არის, თითქოს რაც ევროპულ ბაზარზე არ გაიყიდება, შეგვეძლოს სომხეთის ბაზარზე გავასაღოთ. მალე დავნერგავთ მიკვლევადობისა და ხარისხის კონტროლის სისტემებს, რათა თავად გავაკონტროლოთ და უხარისხო საქონლის გაყიდვა არ დავუშვათ“, - განაცხადა მინისტრმა და დასძინა, რომ სახელმწიფო მხარდაჭერის პროგრამები ყველა ეკონომიკური სუბიექტისთვისაა გათვალისწინებული და მათი უმრავლესობა ამ შესაძლებლობებით სარგებლობს. „ათობით კომპანიას სომხური ყვავილები ევროკავშირში გააქვს. არიან კომპანიებიც, რომლებსაც არ გააქვთ, და ამის მიზეზი ისაა, რომ ეს ყვავილები ევროპულ სტანდარტებს არ შეესაბამება“, - აღნიშნა პაპოიანმა.