2 წუთი კითხვის
ირანში მიმდინარე ომის შედეგად სომხეთის ეკონომიკა ამჟამად ზარალს განიცდის. კონფლიქტის უახლოეს მომავალში დასრულების შემთხვევაში, ზიანი მინიმალური იქნება.
„არმენპრესის“ ცნობით, ამის შესახებ ეროვნული ასამბლეის ეკონომიკურ საკითხთა მუდმივმოქმედი კომიტეტის სხდომაზე სომხეთის ეკონომიკის მინისტრმა გევორგ პაპოიანმა რისკებთან დაკავშირებული კითხვის საპასუხოდ განაცხადა.
„ამ დღეებში ჩვენ ვაფასებთ აღნიშნულ რისკებს. ვიმედოვნებთ, რომ ეს პროცესი მოკლევადიანი იქნება. ასევე იმედს ვიტოვებთ, რომ ჩვენი სტრატეგიული პარტნიორი და მეგობარი ქვეყნები, რომლებიც ახლა კონფლიქტში არიან ჩართულნი, დაასრულებენ დაპირისპირებას. ასეთ შემთხვევაში, ჩვენი აზრით, ზიანი იქნება მაქსიმალურად მცირე. ზარალი აშკარაა ახლაც, კერძოდ, გარკვეულ საქონელზე ფასების ზრდის სახით. პირველ რიგში, ვხედავთ გარკვეულ ინფლაციურ რისკებს. მეორეც - გარკვეული პროდუქციის წარმოებისთვის სომხეთი ნედლეულსაც იღებს, რის შემთხვევაშიც ვხედავთ, რომ კვლავ შესაძლოა წარმოიქმნას მსგავსი ინფლაციური რისკები“, - განაცხადა პაპოიანმა.
სომხეთს ირანთან საკმაოდ დიდი სავაჭრო ბრუნვა აქვს, როგორც იმპორტის, ისე ექსპორტის მიმართულებით. მინისტრის თქმით, შექმნილ ვითარებას სომხეთის ეკონომიკაზე გრძელვადიან პერსპექტივაში ცალსახად დადებითი გავლენა არ ექნება.
„თუმცა, თუ დავაკვირდებით პოლიტიკოსების მაღალი დონის განცხადებებს, ჩანს იმედი იმისა, რომ კონფლიქტი უახლოეს მომავალში დასრულდება. ვფიქრობთ, რომ ასეთ პირობებში ძალიან დიდი უარყოფითი მოლოდინები არ უნდა გვქონდეს“, - აღნიშნა მან.