სომხეთის რესპუბლიკის შინაგან საქმეთა მინისტრმა ბელგიელ კოლეგასთან თანამშრომლობის განვითარების პერსპექტივები განიხილა

სომხეთის რესპუბლიკის შინაგან საქმეთა მინისტრი არფინე სარგსიანი სამუშაო ვიზიტის ფარგლებში ბრიუსელში შეხვდა ბელგიის უსაფრთხოებისა და შინაგან საქმეთა მინისტრს ბერნარ კვენტენს.

„არმენპრესი“-ს ინფორმაციით, სომხეთის შინაგან საქმეთა სამინისტროში აცხადებენ, რომ ბერნარ კვენტენმა მაღალი შეფასება მისცა ორ ქვეყანას შორის ჩამოყალიბებულ პარტნიორულ ურთიერთობებს და ხაზი გაუსვა მათი განმტკიცებისა და უწყვეტი განვითარების აუცილებლობას. უსაფრთხოებისა და შინაგან საქმეთა მინისტრმა დაადასტურა ბელგიის მზადყოფნა, გააფართოოს თანამშრომლობა სომხეთის შინაგან საქმეთა სამინისტროსთან.

არფინე სარგსიანმა, მადლობა გადაუხადა მასპინძელს თბილი მიღებისთვის და მინისტრ კვენტენს თანამდებობაზე დანიშვნა მიულოცა.

სომხეთის შინაგან საქმეთა მინისტრმა წარადგინა სამინისტროს შექმნის პროცესი, სტრუქტურა, ასევე მის დაქვემდებარებაში მყოფი სამსახურებში მიმდინარე რეფორმების ძირითადი მიმართულებები, განსაკუთრებით პოლიციის სფეროში.

მიგრაციის პოლიტიკის ფარგლებში განხილული იქნა ევროკავშირის ვიზალიბერალიზაციის პროცესის მიმდინარე ეტაპი და ამ პროცესთან დაკავშირებული პროგრამების განხორციელებისკენ გადადგმული ნაბიჯები, ხაზგასმით აღინიშნა მათი სტრატეგიული მნიშვნელობა სომხეთსა და ევროკავშირს შორის ურთიერთობების კონტექსტში.

მხარეებმა ასევე განიხილეს ნარკოტიკების უკანონო ბრუნვისა და ორგანიზებული დანაშაულის წინააღმდეგ კოორდინირებული ბრძოლის ეფექტიანი მექანიზმების დანერგვისა და გამოცდილების გაცვლის შესაძლებლობები.

ბელგიის უსაფრთხოებისა და შინაგან საქმეთა მინისტრმა ბერნარ კვენტენმა მიიღო არფინე სარგსიანის მოწვევა ეწვიოს ერევანს.

შეხვედრის დროს ასევე ხაზგასმით აღინიშნა კავშირის ოფიცრების ჩართვის აუცილებლობა ორმხრივი თანამშრომლობის ეფექტიანობის გაზრდისა და ინფორმაციის ოპერატიული გაცვლის მიზნით.

მხარეებმა დაადასტურეს სამინისტროებს შორის ორმხრივი ვიზიტების ორგანიზებისა და მაშველებისა და პოლიციის თანამშრომლების გადამზადების პროგრამების გაფართოების მნიშვნელობა.