ჩინეთი და საფრანგეთი გაამტკიცებენ სტრატეგიულ კომუნიკაციასა და კოორდინაციას

ჩინეთი მზად არის გაამყაროს საფრანგეთთან ორმხრივი და მრავალმხრივი სტრატეგიული კომუნიკაცია და კოორდინაცია და ახალი სტიმული მიანიჭოს ჩინეთსა და საფრანგეთს შორის ურთიერთობების განვითარებას. როგორც „არმენპრესი“ იტყობინება Global Times-ზე დაყრდნობით, ამის შესახებ ქალაქ ნიცაში განაცხადა ჩინეთის ვიცე-პრეზიდენტმა ჰან ჯენგმა, ოკეანეების საკითხებზე გაეროს მესამე კონფერენციის (UNOC) ფარგლებში საფრანგეთის პრეზიდენტ ემანუელ მაკრონთან შეხვედრისას.

მაკრონისთვის ჩინეთის პრეზიდენტ სი ძინპინის მოკითხვების გადაცემისას, ჰანმა აღნიშნა, რომ მაისში გამართული სატელეფონო საუბრისას ორ ქვეყანას შორის ლიდერებმა დეტალურად გაცვალეს მოსაზრებები ურთიერთ ინტერესთა საკითხებზე, როგორიცაა ორმხრივი ჰარმონიისა და კოორდინაციის გაძლიერება, მრავალმხრივობის შენარჩუნება, გლობალური მშვიდობისა და სტაბილურობის ხელშეწყობა, და მივიდნენ მნიშვნელოვან შეთანხმებამდე.

ჰანის თქმით, გაეროს ოკეანეების კონფერენციაში მონაწილეობა სწორედ ამ მნიშვნელოვანი შეთანხმებების განხორციელებას ისახავს მიზნად.

მან ასევე ხაზი გაუსვა, რომ ჩინეთი მხარს უჭერს საფრანგეთს სტრატეგიული ავტონომიის შენარჩუნებაში.

შეეხო რა იმ ფაქტს, რომ წელს ჩინეთსა და ევროკავშირს შორის დიპლომატიური ურთიერთობების დამყარებიდან 50 წელი სრულდება, ჰანმა განაცხადა, რომ არსებული რთული საერთაშორისო ვითარების პირობებში ჩინეთსა და ევროკავშირს შორის თანამშრომლობის განმტკიცება სარგებელს მოუტანს როგორც ორივე მხარეს, ასევე დანარჩენ სამყაროს. მან დაამატა, რომ ჩინეთი მზად არის გააფართოოს თანამშრომლობის სფეროები ევროკავშირთან და ხელი შეუწყოს ჩინეთ-ევროკავშირის ურთიერთობების შემდგომ განვითარებას.

მაკრონმა თავის მხრივ აღნიშნა, რომ საფრანგეთი ჩინეთს აღიქვამს როგორც გრძელვადიან და სანდო პარტნიორს, და არსებული გამოწვევებითა და სირთულეებით სავსე საერთაშორისო ვითარებაში ორივე ქვეყნისთვის მნიშვნელოვანია მაღალი დონის მჭიდრო კონტაქტების შენარჩუნება და კომუნიკაციისა და თანამშრომლობის გაძლიერება გლობალური მშვიდობისა და უსაფრთხოების უზრუნველსაყოფად.

მაკრონის თქმით, საფრანგეთი მიესალმება ჩინური კომპანიების ინვესტიციებსა და ბიზნესს საფრანგეთში და მზად არის გააღრმავოს ორმხრივი ეკონომიკური და სავაჭრო თანამშრომლობა, გააძლიეროს კომუნიკაცია და კოორდინაცია საერთაშორისო ეკონომიკური და ფინანსური პოლიტიკის საკითხებზე, ერთობლივად უპასუხოს გლობალურ გამოწვევებს, როგორიცაა კლიმატის ცვლილება და ბიომრავალფეროვნება, დაიცვას მრავალმხრივობა და ამ არასტაბილურ სამყაროში ორი მთავარი კონსტრუქტიული ძალის როლში მეტი ნდობა შემატოს მსოფლიოს.