«Արմենպրես»-ն իր ուրույն տեղն ունի հայաստանյան լրատվական տիրույթում. Արայիկ Հարությունյան
1 րոպեի ընթերցում
ԵՐԵՎԱՆ, 18 ԴԵԿՏԵՄԲԵՐԻ, ԱՐՄԵՆՊՐԵՍ: Կրթության, գիտության, մշակույթի և սպորտի նախարար Արայիկ Հարությունյանը շնորհավորական ուղերձ է հղել «Արմենպրես» պետական լրատվական գործակալության տնօրեն Արամ Անանյանին՝ գործակալության 101-ամյակի կապակցությամբ:
Ուղերձում, մասնավորապես, ասված է. «Շնորհավորում եմ «Արմենպրես» լրատվական գործակալության ստեղծագործ կոլեկտիվին՝ գործունեության 101-ամյակի կապակցությամբ:
«Արմենպրես» գործակալությունն իր ուրույն տեղն ունի հայաստանյան լրատվական տիրույթում: Անաչառ, հավաստի և օպերատիվ լրատվությունն այսօր մեր ժամանակների կարևոր հրամայականն է և պետք է լինի բոլոր զանգվածային լրատվամիջոցների գործունեության կարևորագույն բաղադրիչը:
«Արմենպրես» գործակալությունը, որդեգրելով հենց այս սկզբունքները և դարձնելով այն գործունեության հիմնական ուղենիշ, տասնամյակներ շարունակ լրատվական դաշտի առաջնագծում է, և հենց դա է հանրային նրա բարձր վարկանիշի և հաջողության գրավականը:
Շնորհավորելով գործակալության բոլոր աշխատակիցներին տարեդարձի առիթով՝ ցանկանում եմ ստեղծագործական հաջողություններ, ընթերցողների կայուն լսարան, անմնացորդ նվիրում՝ ի նպաստ մեր ընդհանուր նպատակների իրականացման»: