Կրթական ոլորտի արդիականացմանը միտված հանդիպումներ. Մխիթար Հայրապետյանի այցը Շվեդիա ավարտվել է
2 րոպեի ընթերցում
ԵՐԵՎԱՆ, 6 ԴԵԿՏԵՄԲԵՐԻ, ԱՐՄԵՆՊՐԵՍ: ՀՀ Ազգային ժողովի գիտության, կրթության, մշակույթի, սփյուռքի, երիտասարդության եւ սպորտի հարցերի մշտական հանձնաժողովի նախագահ Մխիթար Հայրապետյանը եւ փոխնախագահ Հովհաննես Հովհաննիսյանն աշխատանքային այցով դեկտեմբերի 4-5-ը գտնվում էին Շվեդիայի Թագավորությունում:
Ինչպես «Արմենպրես»-ին տեղեկացրին ՀՀ ԱԺ լրատվության և հանրության հետ կապերի վարչությունից, պատգամավորներն այցելել են Ռիկսդագ, որտեղ հանդիպել են կրթության հանձնաժողովի նախագահ Գունիլա Սվանտորպի հետ: Շվեդական կողմը ներկայացրել է կրթության ասպարեզում հաջողությունները: Քննարկվել են կրթության ոլորտում համագործակցությանը վերաբերող հարցեր:
Մխիթար Հայրապետյանն ու Հովհաննես Հովհաննիսյանը եղել են նաեւ շվեդական հայտնի «Ֆրուշուսետ» երիտասարդական կազմակերպությունում, որտեղ խրախուսում են պատանիների զարգացումը եւ նրանց կրթական նոր հնարավորություններ ընձեռելը: Մխիթար Հայրապետյանի խոսքով` առաջիկայում նախատեսվում է նմանատիպ մի կենտրոն հիմնել նաեւ Երեւանի արվարձաններից մեկում:
«Հաջորդիվ խորհրդարանականները Շվեդիայում Հայաստանի դեսպանության ներկայացուցիչների հետ այցելել են Շվեդիայի՝ մեծությամբ չորրորդ` Ուփսալա քաղաք, որտեղ հանդիպումներ են ունեցել երկրի գյուղատնտեսական գիտությունների, ինչպես նաեւ Ուփսալայի համալսարանի պրոֆեսորադասախոսական կազմի ներկայացուցիչների հետ: Վերջիններիս հետ հայ պատգամավորները քննարկել են հայկական բուհերի հետ Ուփսալայի համալսարանի համագործակցության հեռանկարները: Համալսարանում շրջայցից հետո Մխիթար Հայրապետյանը գրառում է կատարել շուրջ 6 դար գործող համալսարանի գրադարանի այցելուների մատյանում»,- ասվում է հաղորդագրության մեջ: