Արշակունյաց և Բագրատունյաց պողոտաների խաչմերուկում վթարված ավտոմեքենայից վառելիք է արտահոսել

ԵՐԵՎԱՆ, 3 ՆՈՅԵՄԲԵՐԻ, ԱՐՄԵՆՊՐԵՍ: ՀՀ արտակարգ իրավիճակների նախարարության «911» ծառայությունը նոյեմբերի 3-ին, ժամը 02:52-ին տեղեկություն է ստացել, որ Երևանի Արշակունյաց և Բագրատունյաց պողոտաների խաչմերուկում այրվում է ավտոմեքենա:

Դեպքի վայր է մեկնել ԱԻՆ փրկարար ծառայության Երևան քաղաքի փրկարարական վարչության հրշեջ-փրկարարական ջոկատի երկու մարտական հաշվարկ:

Ինչպես «Արմենպրես»-ին տեղեկացրին նախարարության տեղեկատվության և հասարակայնության հետ կապերի վարչությունից, պարզվել է, որ «Mazda 3» մակնիշի ավտոմեքենան (վարորդ՝ Մուշեղ Փ. ծնված 1996 թ.) դուրս է եկել երթևեկելի հատվածից և բախվել ավտոճանապարհի բաժանարար արգելապատնեշին, առկա է վառելիքի արտահոսք. տուժածներ չկան:

Փրկարարները հոսանքազրկել են ավտոմեքենան և կատարել արտահոսած վառելիքի մաքրման աշխատանքներ։ Հրդեհի նշաններ չեն հայտնաբերվել: