2 րոպեի ընթերցում
ԵՐԵՎԱՆ, 17 ՀՈԿՏԵՄԲԵՐԻ, ԱՐՄԵՆՊՐԵՍ: Ճապոնացի հայտնի երաժիշտ Իրիե Յոսուկեն հոկտեմբերի 16-ին ելույթ ունեցավ Կոմիտասի անվան թանգարան-ինստիտուտում: «Արմենպրես»-ի հաղորդմամբ` նա ճապոնական ինքնատիպ գործիքի`շակուհաչիի գեղեցիկ մեղեդիներով գրավեց դահլիճում ներկա արվեստասերներին:
Համերգին բացման խոսքով հանդես եկավ ՀՀ-ում Ճապոնիայի արտակարգ և լիազոր դեսպան Ջուն Յամադան` նշելով, որ մեծ պատիվ է բոլորին հրավիրել ճապոնական մշակութային միջոցառմանը և ողջունել շակուհաչիի` հնդկեղեգի ֆլեյտայի կատարող Իրիե Յոսուկեին:
«Չնայած Հայաստանի և Ճապոնիայի աշխարհագրական հեռավորությանը, մեր երկու ժողովուրդները զարմանալիորեն շատ ընդհանուր հոգևոր արժեքներ ունեն, որոնք առավել ակնհայտ են մեր երաժշտական մոտեցումներում: Ես խորապես համոզված եմ, որ երաժշտությունը կարևոր հիմնասյուն է ազգերի միջև երկխոսության և բարեկամական կապերի ամրապնդման համար»,-շեշտեց դեսպանը:
Անդրադառնալով ֆլեյտահար Իրիե Յոսուկեին` Յամադան ընդգծեց, որ նա անվանի ճապոնացի երաժիշտ է, որը ճապոնական մշակույթը ներկայացրել է բազմաթիվ երկրներում` իր երաժշտությամբ փորձելով խաղաղություն տարածել տարբեր ժողովուրդների միջև:
«Սա նրա երկրորդ այցն է Հայաստան, և ես կարծում եմ, որ մենք կկարողանանք երաժշտության միջոցով էլ ավելի զարգացնել երկու երկրների փոխհարաբերությունները` համագործակցելով հայ և ճապոնացի արվեստագետների հետ»,-ասաց Ջուն Յամադան:
Իրիե Յոսուկեն տպավորեց երաժշտասերներին իր կատարումներով և փորձեց նվագել սովորեցնել ներկաներին: