ԱԺ-ն ընդունեց պատգամավորի գործունեության երաշխիքների մասին օրենքում փոփոխությունների օրինագիծը
1 րոպեի ընթերցում
ԵՐԵՎԱՆ, 16 ՍԵՊՏԵՄԲԵՐԻ, ԱՐՄԵՆՊՐԵՍ: ՀՀ Ազգային ժողովը երկրորդ ընթերցմամբ և ամբողջությամբ ընդունեց «ՀՀ Ազգային ժողովի պատգամավորի գործունեության երաշխիքների մասին» օրենքում փոփոխություն կատարելու մասին» նախագծի լրամշակված տարբերակը: «Արմենպրես»-ի փոխանցմամբ` նախագիծը հեղինակել է «Բարգավաճ Հայաստան» խմբակցության անդամ Սերգեյ Բագրատյանը:
Նախագծով առաջարկվում է ամրագրել, որ պետական և տեղական ինքնակառավարման մարմիններն ու պաշտոնատար անձինք պետք է տասնօրյա ժամկետում քննարկեն պատգամավորի գրավոր հարցումը կամ առաջարկը և գրավոր պատասխանեն նրան: Բացառիկ դեպքերում, եթե գրավոր հարցման մեջ նշված տեղեկությունը տրամադրելու կամ առաջարկը քննարկելու համար անհրաժեշտ է կատարել լրացուցիչ աշխատանք, ապա այդ տեղեկությունը պատգամավորին է տրվում դիմումն ստանալուց հետո՝ երեսնօրյա ժամկետում՝ հարցումը կամ առաջարկը ստանալուց հետո՝ տասնօրյա ժամկետում պատգամավորին գրավոր տեղյակ պահելով հետաձգման պատճառների մասին: