Կառավարության և հանրության միջև կա երկխոսություն. Նիկոլ Փաշինյան 

ԵՐԵՎԱՆ, 29 ՕԳՈՍՏՈՍԻ, ԱՐՄԵՆՊՐԵՍ: Կառավարության որոշմամբ «Հայաստանի պետական ազգային ակադեմիական երգչախումբ» ՊՈԱԿ-ին 2019 թվականի պետական բյուջեից կհատկացվի 57 միլիոն 762 հազար դրամ:

Կրթության, գիտության, մշակույթի և սպորտի նախարար Արայիկ Հարությունյանը նշեց, որ մինչև 2018 թվականը լրավճարներն իրականացվել են «Լույս» հիմնադրամի միջոցներից, իսկ նախորդ տարի իրականացրել է Մշակույթի նախարարությունը, ապա՝ «Իմ քայլը» հիմնադրամը:

«Գաղափարական և սկզբունքային հարց կա, քանի որ ասում ենք ՀՀ պետական ազգային ակադեմիական երգչախումբ, անհասկանալի է, թե ինչու այն պետք է ֆինանսավորվի անհատների, բարեգործների կողմից»,- «Արմենպրես»-ի փոխանցմամբ, ասաց Վարչապետ Նիկոլ Փաշինյանն ու հավելեց, որ պետությունը պետք է իր պարտավորությունները կատարի և պայմաններ առաջադրի: «Իմ եզրակացությունն այսպիսին է.մենք արվեստին և մշակույթին պետք է նայենք որպես մեր տնտեսության ճյուղերից մեկի, իմ ընկալմամբ՝ դա տնտեսության ճյուղ է, որին պետությունն ինչ-որ առումով ֆինանսավորում է, և պետք է հասկանանք, թե դրա արդյունքում ինչ ենք ստանում»,-ասաց նա և նշեց, որ հարկավոր է ապրել տնտեսական կանոններով:

Ըստ Փաշինյանի՝ այս ոլորտում հարկավոր է հստակ խնդիր դնել՝ մեծացնել թանգարանների կոլեկտիվների, թատրոնների եկամուտները: «Սա չի նշանակում, որ պետք է իրենք շահութաբեր լինեն, թեև դա էլ ինչ-որ պահի պետք է դառնա խոսակցության նյութ, մենք ասում ենք, որ պետք է եկամուտներն ավելանան»,-ասաց նա:

Արայիկ Հարությունյանը նշեց, որ փոխվելու է նաև դրամաշնորհներ տրամադրելու կոնցեպտը:

Վարչապետը ներկայացրեց, որ այս տարվա առաջին կիսամյակի տվյալներով թանգարանների այցելուների թիվը աճել է 31 տոկոսով, թատրոնների այցելուների թիվը՝ 41 տոկոսով: «Այս թվերը ցույց են տալիս մի կարևոր բան. Հայաստանի կառավարության և հանրության մեջ կա երկխոսություն, այդ երկխոսությունը տեղի է ունեցել և տեղի է ունենում, բոլոր ցուցանիշները, որ ունենք, այդ երկխոսության արդյունքն են: Մեր երկրում պետք է բացառել այնպիսի թանգարանների գոյությունը, որտեղ մարդ չի մտնում: Ես համոզվել եմ, որ մեր երկրում կան թանգարաններ, որոնք ճիշտ ներկայացնելու դեպքում, այցելուների կիլոմետրերով հերթեր կառաջանան և՛ Գյումրիում, և՛ Երևանում»:

Վարչապետն ասաց, որ եթե կա մի թանգարան, որի ղեկավարությունը խնդիրը չի կարողանում լուծել, պետք է փոխել ղեկավարությանը: «Կլինեն ակցիաներ, ցույցեր, բայց սա ռազմավարական խնդիր է: Պարապությունը որևէ ոլորտից պետք է բացառել, որտեղ պարապ մարդ տեսանք, պետք է ուղարկենք տուն՝ հանգստանալու»,-ասաց նա:

Նիկոլ Փաշինյանը նշեց, որ այս խնդիրն ամբողջությամբ կլուծվի մյուս տարվա բյուջեով: «Մենք չպետք է մեր երկրի կարևորագույն մշակութային օջախները դնենք այն վիճակում, որ, ներողություն, «ծուռ վզով» գնան տարբեր բարեգործական կազմակերպությունների մոտ, թե փող տվեք, որ գոյատևենք, պայմանով, որ պետք է հստակ պայմաններ դրվեն»,-ասաց նա: