Իտալիայի նախագահը Կոնտեին հանձնարարել Է կազմել նոր կառավարություն
2 րոպեի ընթերցում
![Իտալիայի նախագահը Կոնտեին հանձնարարել Է կազմել նոր կառավարություն](http://armenpress.am/resized/480/static/news/b/2019/08/986280.jpg)
ԵՐԵՎԱՆ, 29 ՕԳՈՍՏՈՍԻ, ԱՐՄԵՆՊՐԵՍ: Իտալիայի նախագահ Սերջո Մատարելլան օգոստոսի 29-ի առավոտյան ընդունել Է երկրի պաշտոնաթող եղած վարչապետ Ջուզեպե Կոնտեին եւ նրան հանձնարարել՝ կազմել նոր ազգային կառավարություն: Այդ մասին, ինչպես տեղեկացնում Է «Արմենպրես»-ը, հայտնել Է նախագահի դիվանատան գլխավոր քարտուղար Ուգո Ձամպետին:
Ավելի վաղ Կոնտեի թեկնածությունն առաջադրել Էին «5 աստղերի շարժումը» եւ նախկինում ընդդիմադիր Դեմոկրատական կուսակցությունը, որոնք կկազմեն նոր խորհրդարանական մեծամասնության հիմքը: «Նախագահ Սերջո Մատարելլան ընդունել Է Ջուզեպե Կոնտեին եւ նրան առաջարկել՝ կազմել կառավարություն, Կոնտեն մանդատն ընդունել Է»,- ասել Է Ձամպետին, որի ելույթն ուղիղ եթերով հեռարձակել Է Rai պետական հեռուստատեսությունը:
Ներկայիս կառավարական ճգնաժամն սկսվել Է օգոստոսի 8-ին, երբ փոխվարչապետ եւ «Լիգա» կուսակցության առաջնորդ Մատեո Սալվինին Կոնտեին ծանուցեց խորհրդարանական մեծամասնության տրոհման մասին, որը «Լիգան» կազմում Էր «Շարժման» հետ, եւ պահանջեց վաղաժամկետ ընտրությունների շուտափույթ անցկացում: Արդյունքում Կոնտեն հարկադրված Էր Մատարելլային պաշտոնաթողության խնդրագիր տալ, իսկ հանրապետության նախագահը նշանակեց կոնսուլտացիաներ, որոնք փակուղու դեպքում կարող Էին ավարտվել խորհրդարանի արձակմամբ եւ նրա կողմից վաղաժամկետ ընտրությունների նշանակմամբ, հաղորդել Է ՌԻԱ Նովոստին: