2 րոպեի ընթերցում
ԵՐԵՎԱՆ, 11 ՀՈՒԼԻՍԻ, ԱՐՄԵՆՊՐԵՍ: Թուրքիայի, Կանադայի և Ֆրանսիայի համատեղ արտադրության «Կապվածություն» կինոնկարի ռեժիսոր Բուրաք Չևիքը ժապավենի միջոցով փորձել է հանդիսատեսին ներկայացնել անձնական պատմությունը, հիշողությունները, հույզերն ու ապրումները:
2019 թվականին նկարահանված կինոնկարը ներկայացված է «Ոսկե ծիրան» 16-րդ միջազգային կինոփառատոնի լիամետրաժ ֆիլմերի մրցույթում:
«Արմենպրես»-ի հաղորդմամբ` Ֆիլմը քրեական գործի վայրերին առնչվող տեղագրական զննություն է դեպքից 15 տարի անց, կասկածյալների ցուցմունքների ուղեկցությամբ, ապա ներկայացվում է մարդասպան զույգի հանդիպման գիշերը:
Հուլիսի 11-ին լրագրողները հանդիպեցին կինոնկարի արտ-տնօրեն Դիլսադ Ալադագի հետ, որը մանրամասներ ներկայացրեց ֆիլմից:
«Ժապավենի մի հատվածում ներկայացվում է թաղման արարողություն, իսկ մյուս մասում անդրադարձ կա թաղում իրականացնող զույգին: Շատերն են ասում, որ կինոնկարի երկրորդ մասը բավականին ռոմանտիկ է»,-ասաց Ալադագը:
Նրա խոսքով` մեծ հետաքրքրությամբ է այցելել այն վայրերը, որոնք ներկայացվում են ժապավենում: Նկարահանումներ իրականացնելիս մեզ համար կարևոր էր ֆիլմը դիտողներին փոխանցել այն հույզերը, որոնք ունի մեր ռեժիսորը: «Հուսամ` ստացվել է»,-շեշտեց արտ-տնօրենն ու խոստովանեց, որ դեռևս չի հաջողվել Թուրքիայի որևէ լուրջ փառատոնում ներկայացնել կինոնկարը, ապահովել դիտողների մեծ քանակ, սակայն այն մարդիկ, որոնք նայել են կինոնկարը, միայն դրական են արձագանքել:
Ալադագն ընդգծեց, որ ֆիլմը նկարահանել են փոքր բյուջեով, հակառակ դեպքում այն ավելի ծավալուն ու ուշագրավ կարող էր լինել: «Թուրքիայում ժապավենը որակվել է որպես համարձակ քայլ կինոարվեստում, քանի որ այն հակադրվում է ավանդական կինոմտածողությանը: Մենք այդ գիծը փորձելու ենք պահպանել նաև մեր մյուս ֆիլմերում»,-եզրափակեց նա: