1 րոպեի ընթերցում
ԵՐԵՎԱՆ, 27 ՀՈՒՆԻՍԻ, ԱՐՄԵՆՊՐԵՍ: Հայաստանի և Մալթայի արտաքին գերատեսչությունների ղեկավարների հաջորդ հանդիպմանը կստորագրվի կրկնակի հարկումը բացառելու մասին համաձայնագիր: Ինչպես տեղեկացնում է «Արմենպրես»-ը, այս մասին հունիսի 27-ին ՀՀ ԱԳՆ-ում ասաց Մալթայի արտաքին գործերի և առևտրի խթանման նախարար Կարմելո Աբելան:
«Այն արդեն վերջնական տեսքի է բերվել մեր տեխնիկական անձնակազմերի կողմից, ուստի հաջորդ քայլը կլինի այդ համաձայնագրի ստորագրումը»,- նշեց Աբելան:
Նա կարևորեց նաև երկու երկրների միջև օդային հաղորդակցության հաստատումը:
«Գուցե այն բացվի հաջորդ տարի։ Մենք Հայաստան հասնելու համար եկել ենք մի ամբողջ օր: Իրականում թռիչքն այստեղ ընդամենը 4 ժամ կտևեր»,- նշեց Կարմելո Աբելան: