Կառավարության նախնական գնահատականով՝ հարկային եկամուտների հավաքագրման աստիճանը 7 տոկոսով զիջում է հարկային պոտենցիալին
2 րոպեի ընթերցում
ԵՐԵՎԱՆ, 19 ՀՈՒՆԻՍԻ, ԱՐՄԵՆՊՐԵՍ: ՀՀ կառավարությունը նախատեսում է հարկային եկամուտների հավաքման աստիճանը մոտեցնել գնահատված հարկային պոտենցիալին: Ըստ նախնական մեթոդաբանությամբ կատարված գնահատակաների՝ 7 տոկոսի չափով զիջում են պոտենցիալին: «Արմենպրես»-ի հաղորդմամբ՝ այս մասին ԱԺ-ում 2018-ի պետական բյուջեի կատարման մասին հաշվետվությունը ներկայացնելուց հետո ասաց ՀՀ ֆինանսների նախարար Ատոմ Ջանջուղազյանը՝ պատասխանելով «Բարգավաճ Հայաստան» խմբակցության պատգամավոր Միքայել Մելքումյանի հարցին:
Մելքումյանը նշեց՝ քննարկվում է, որ 62 մլրդ դրամ միջոցներ են գալու բյուջե, սա նշանակում է, որ ստվերը կրճատվում է: «Ինչ եք կարծում մենք ստվերի ո՞ր մակարդակի վրա ենք, և ո՞ր ոլորտներն են ամենառիսկայինը մնացել»,-հետաքրքրվեց պատգամավորը
«Մենք հիմա մեր ծրագրում ունենք մի մաս, ըստ որի՝ նախատեսվում է, որ հարկային եկամուտների հավաքման աստիճանը կմոտեցվի գնահատված հարկային պոտենցիալին: Դա նշանակում է, որ մենք որոշակի մեթոդաբանությամբ գնահատել ենք մեր տնտեսությունում հարկային պոտենցիալը՝ հաշվի առնելով թե տնտեսական կառուցվածքը, թե զարգացումները, թե կարգավորումները, որոնք կապված են հարկային համակարգի հետ: Վերջնական չէ՝ ճիշտ է, թե սխալ այդ մեթոդաբանությունը, սակայն, ըստ դրա, մոտ 7 տոկոսի չափով դեռևս զիջում ենք պոտենցիալին»,-ասաց Ջանջուղազյանը:
Նա նշեց, որ դա, սակայն, ամենևին չի նշանակում, թե այդ 7 տոկոսն ամբողջությամբ ստվեր է: