2 րոպեի ընթերցում
ԵՐԵՎԱՆ, 24 ՄԱՅԻՍԻ, ԱՐՄԵՆՊՐԵՍ: ՀՀ Ազգային ժողովի նախագահի տեղակալ Ալեն Սիմոնյանը Հայ յեղափոխական դաշնակցություն կուսակցության իրականացրած հանրահավաքը բնականոն քաղաքական գործընթաց է համարում: «Արմենպրես»-ի փոխանցմամբ` այս մասին Սիմոնյանը հայտնեց մայիսի 24-ին ՀՀ Ազգային ժողովում լրագրողների հետ զրույցում:
«Կարծում եմ, որ Հայ յեղափոխական դաշնակցություն կուսակցությունն ավելի ակտիվ պետք է լինի քաղաքական դաշտում, որովհետև դրա անհրաժեշտությունը կա ու միշտ եղել է: Քաղաքական գործընթաց է, շատ դրական եմ վերաբերում դրան»,- նշեց Սիմոնյանը:
ԱԺ փոխնախագահը հավելեց, որ ի պատասխան հանրահավաքի կազմակերպիչների կողմից իշխանությանը լրջանալու կոչերին, չի պատրաստվում կուսակցության հասցեին բացասական բան ասել, քանի որ հանրահավաքի մեջ որևէ վատ բան չի տեսել:
«Որևէ բացասական բան չեմ տեսել նրանց արածի մեջ: Նրանք արել են հանրահավաք: Քաղաքական ուժ են, հանրահավաք են անում: Ես ավելի մեծ քննադատություն էի սպասում նրանցից: Ինձ համար անհասկանալի է մեծ քաղաքական կառույցի կողմից էմոցիոնալ եզրույթներով խոսելը»,- ասաց Ալեն Սիմոնյանը:
Մայիսի 23-ին ՀՅԴ-ն Երևանի Ազատության հրապարակում կազմակերպել էր հանրահավաք, որին մասնակցում էին ՀՅԴ Գերագույն մարմնի ու բյուրի անդամները՝ Իշխան Սաղաթելյանը, Հրանտ Մարգարյանը, Արմեն Ռուստամյանը, Գեղամ Մանուկյանը, Արթուր Խաչատրյանը: