Նիկոլ Փաշինյանի քայլարշավի հետքերով. լուսանկարիչը 1 տարի անց անցնում է Գյումրի-Երևան ճանապարհը
2 րոպեի ընթերցում
ԵՐԵՎԱՆ, 5 ԱՊՐԻԼԻ, ԱՐՄԵՆՊՐԵՍ: Լուսանկարիչ Նարեկ Արշակյանը 1 տարի անց քայլարշավ է սկսել Գյումրիից՝ մարտի 31-ին ժամը 12:00-ին, ճիշտ նույն օրն ու նույն ժամին, ինչ Նիկոլ Փաշինյանն էր սկսել մեկ տարի առաջ:
«Արմենպրես»-ի հաղորդմամբ՝ քայլարշավի առաջին կանգառը եղել է Ջաջուռ գյուղում, հետո լուսանկարիչը շարժվել է դեպի Վանաձոր և այժմ հասել է Ֆիալետովո գյուղ:
Երևան վերադառնալուց հետո նա պատրաստվում է լուսանկարչական ցուցահանդես բացել: «Ցուցահանդեսը որոշել եմ իրականացնել զգալու համար ՀՀ վարչապետ Նիկոլ Փաշինյանի ապրումները, այդ ժամանակվա ցուրտը, գիշերը, գուցե նաև սովը, հոգնածությունը, մարդկանց ուշադրությունը և հասկանալու համար, թե ինչպես է սկսվել մեր հեղափոխությունը»,- նշեց Նարեկ Արշակյանը:
Այն բոլոր քաղաքներում ու գյուղերում, որտեղ կանգնել է վարչապետը, նա կանգնում է ու լուսանկարում նրանց մնալու վայրը և այն հատվածները, որոնք հիշեցնում են մեկ տարի առաջ տեղի ունեցածը, օրինակ՝ խարույկի համար հավաքած քարեր:
Ամենակարևոր առանձնահատկությունը լինելու են ծառերը, որ ամեն օր ինչ-որ խորագրով տարբեր քաղաքներում ու գյուղերում տնկել են Նիկոլ Փաշինյանն ու իր թիմը: Լուսանկարչի խոսքով քայլարշավի ու ցուցահանդեսի միտքը հղացել է մոտ երկու ամիս առաջ, քանի որ նա ցանկացել է հասկանալ, թե այդ ժամանակ ինչ են զգացել Նիկոլ Փաշինյանն ու իր թիմը:
«Ծառերը նկարելն էլ գուցե հետագայում դառնա ավանդույթ ու ամեն տարի նկարեմ դրանց աճը»,- նշեց Նարեկը:
Ցուցահանդեսի տարածքը դեռևս հստակեցված չէ, սակայն բուն գործընթացը հստակ է ու նպատակ ունի ցույց տալու հեղափոխության առաջին օրերի ողջ խորհուրդը:
«Դիլիջանում տնկվել էր մի ծառ, որ կրում է «Արդարություն» անվանումը՝ ի նշան նախորդ օրը բերման ենթարկված անձանց ազատության»,- ասաց Նարեկ Արշակյանը:
Լիլիթ Դեմուրյան