Տենոր Մասիս Առաքելյանը Էրեբունի-Երևանի 2800-ամյակին նվիրված համերգով հանդես է եկել Բեռլինում
1 րոպեի ընթերցում
ԵՐԵՎԱՆ, 13 ՄԱՐՏԻ, ԱՐՄԵՆՊՐԵՍ: Գերմանաբնակ տենոր և երգահան Մասիս Առաքելյանը Բեռլինի Կայզեր-Վիլհելմ-Գեդեխթնիս եկեղեցում իր «Կռունկ և պոետի սերը» ծրագրով հանդես է եկել Էրեբունի-Երևանի 2800-ամյակին նվիրված մենահամերգով։
«Արմենպրես»-ի հաղորդմամբ` համերգին մասնակցել են դաշնակահար Դիթլինդ-Մարիա Շթռոփալը, ջութակահար Դավիթ Խաչատրյանը, թավջութակահար Միքայել Հախնազարյանը:
Համերգում ներկայացվել են Մասիս Առաքելյանի ջութակի և թավջութակի համար գրված և քառյակի համար մշակված ստեղծագործություններ, Կոմիտասի, Գրիգոր Թալյանի, գերմանացի հայտնի կոմպոզիտոր և գերմանական գեղարվեստական երգի հիմնադիրներից մեկը հանդիսացող Ռոբերտ Շումանի գործերը։
Գերմանացի և այլ ազգերի հյուրերի արձագանքը չափազանց դրական է եղել։ Հայ և գերմանական երաժշտության համադրումն ու համեմատումը, որպես նոր աշխատանք, հետաքրքրել և հիացրել է պահանջկոտ հանդիսատեսին։