Ֆինանսական հաշտարարի գրասենյակի կողմից ընդունված բողոքների մոտ 68 տոկոսը լուծվել է հօգուտ հաճախորդների
2 րոպեի ընթերցում
ԵՐԵՎԱՆ, 24 ՀՈՒՆՎԱՐԻ, ԱՐՄԵՆՊՐԵՍ: Ֆինանսական համակարգի հաշտարարի գրասենյակի ստացած բողոքների թիվը թեև նախորդ տարի ավելացել է, սակայն կեսից ավելին լուծվել է հօգուտ հաճախորդի:
«Արմենպրես»-ի հաղորդմամբ՝ այս մասին գրասենյակի 10-ամյակին նվիրված ասուլիսում հայտնեց Ֆինանսական համակարգի հաշտարար Փիրուզ Սարգսյանը:
«Պահանջների քննության արդյունքում գործերի 67.49%-ը հանգուցալուծվել է հօգուտ հաճախորդի: Այս պահին 2 959 գրավոր պահանջները դեռ լիովին հանգուցալուծված չեն: Քննության ընդունված 2 959 պահանջներից 595-ը այս տարվա հունվարի 16-ի դրությամբ դեռևս գտնվում է քննության փուլում: Ընդ որում, դրական ելքով գործերի 33,42%-ը լուծվել է ֆինանսական կազմակերպության հետ հաշտության գալու միջոցով»,-ասաց Սարգսյանը:
2018 թ. քննության ընդունված 2 364 գործերի շրջանակում հաշտարարի միջնորդությամբ հաճախորդներին ֆինանսական կազմակերպությունների կողմից հատուցվել է 248 999 574 ՀՀ դրամ գումար:
2018 թ. Գրասենյակ է ներկայացվել ընդհանուր 6 421 բողոք, որոնցից 5 892-ը վերաբերում է ֆինանսական համակարգին: Նախորդ տարվա համեմատ ֆինանսական համակարգին վերաբերող բողոքների ցուցանիշն աճել է 34.77%-ով: Գրասենյակի կողմից 2018 թ. քննության է ընդունվել թվով 2,959 պահանջ, ինչը 77.00%-ով գերազանցում է 2017թ. համապատասխան ցուցանիշը: