Պետք է համազգային ներուժը համախմբել Արցախի հարցում մեր շահերը լիարժեք պաշտպանելու համար. Նիկոլ Փաշինյան

ԵՐԵՎԱՆ, 20 ՆՈՅԵՄԲԵՐԻ, ԱՐՄԵՆՊՐԵՍ: Սահմանին հարաբերական հանգստությունը Դուշանբեում ձեռք բերված պայմանավորվածությունների արդյունք է: Այս մասին լրագրողների հետ հանդիպմանն ասաց ՀՀ վարչապետի պաշտոնակատար Նիկոլ Փաշինյանը:

«Օպերատիվ կապը պայմանավորվածության հարակից բաղադրիչներից մեկն է: Այս մասով էլ քննարկումներ եղան, ոմանք կարծում էին, թե ես և Ադրբեջանի նախագահը միմյանց հետ առավոտից երեկո խոսում ենք: Իհարկե, այդպես չէ, ներկայացուցիչների միջոցով, ըստ անհրաժեշտության, տեղեկատվություն էր փոխանցվում»,- «Արմենպրես»-ի հաղորդմամբ, ասաց Նիկոլ Փաշինյանը:

Նա նշեց, որ Արցախի խնդրի հետ կապված իր դիրքորոշումը հստակ ասել է:

«Մենք պետք է մեր համազգային ներուժը համախմբենք Արցախի հարցում մեր շահերը լիարժեք պաշտպանելու, հետապնդելու համար: Ակնհայտ է, որ Արցախի հարցը երկրի ժողովրդի համար ունի անկյունաքարային նշանակություն»,-ասաց Նիկոլ Փաշինյանը:

Նրա խոսքով՝ բանակցային գործընթացը, կարծես, առաջին օրից խորհրդավորության քողով է պատել: Ըստ Նիկոլ Փաշինյանի՝ նույնիսկ ընկալում կա, որ Արցախի բանակցային գործընթացին տիրապետում են սահմանափակ թվով մարդիկ:

«Ես այս մոտեցումը սխալ եմ համարում: Կարծում եմ, որ Արցախի հարցի շուրջ տեղի ունեցող բանակցային գործընթացին պետք է տիրապետի հնարավորինս շատ մարդ: Հայ ժողովուրդը Արցախի հարցի վերաբերյալ բանակցային գործընթացին և բովանդակությանը տեղեկացված է առավել, քան երբևէ: Այս մոտեցումը շարունակվելու է»,-ասաց նա: