1 րոպեի ընթերցում
ԵՐԵՎԱՆ, 16 ՆՈՅԵՄԲԵՐԻ, ԱՐՄԵՆՊՐԵՍ։ ՀՀ նախկին վարչապետ Հովիկ Աբրահամյանի որդին՝ Արգամ Աբրահամյանը առաջիկա խորհրդարանական ընտրություններին ԲՀԿ ցուցակով չի առաջադրվել անձնական ցանկությամբ: «Արմենպրես»-ի հաղորդմամբ՝ այս մասին ԱԺ-ում լրագրողների հետ զրույցում ասաց «Ծառուկյան» խմբակցության պատգամավոր Վահե Էնֆիաջյանը:
«Ցուցակում չլինելը Արգամ Աբրահամյանի անձնական ցանկությունն է եղել: Իմ անձնական համոզմունքն է, որ նա բավականին մեծ հեղինակություն է վայելում՝ հատկապես Արարատի մարզում»,-ասաց Էնֆիաջյանը:
Անդրադառնալով լրագրողի դիտարկմանը, թե Արգամ Աբրահամյանը հրաժարվել է ընդգրկվել ԲՀԿ-ի ցուցակում եւ մասնակցել դեկտեմբերի 9-ին կայանալիք արտահերթ խորհրդարանական ընտրություններին՝ մտավախություն ունենալով, որ կուսակցությունը 5 տոկոսի շեմը չի հաղթահարի, Էնֆիաջյանը պատասխանեց, որ քաղաքական թիմը քննարկել է և որոշում է կայացրել: «Եվ այս տեսքը ստացվել է մեր քաղաքական որոշումների արդյունքում: Շեմն անցնել-չանցնելու բովանդակությամբ քննարկում չի եղել»,-ասաց նա ու հավելեց՝ նման խոսակցություններն ապատեղեկատվություն են:
Էնֆիաջյանը նշեց, որ իրենց ցուցակում նաև նոր մարդիկ կան, ովքեր չեն եղել պատգամավոր: Դա ակնհայտ փոփոխություն է: