Ընտրությունների արդյունքներն ու թիմային քննարկումները ցույց կտան, թե ով կհավակնի ԱԺ նախագահի պաշտոնին. Արայիկ Հարությունյան

ԵՐԵՎԱՆ, 15 ՆՈՅԵՄԲԵՐԻ, ԱՐՄԵՆՊՐԵՍ: Արտահերթ խորհրդարանական ընտրությունների արդյունքները և թիմային քննարկումները ցույց կտան, թե ով կհավակնի Ազգային ժողովի նախագահի պաշտոնին: Այդ մասին կառավարության նիստից հետո լրագրողների հետ զրույցում ասաց Կրթության և գիտության նախարարի պաշտոնակատար Արայիկ Հարությունյանը՝ անդրադառնալով ԱԺ նախագահի հավակնորդներից մեկը լինելու մասին տեղեկություններին:

«Կարծում եմ՝ որևէ քաղաքական գործչի համար նման սահմանափակումներ չկան, յուրաքանչյուրն իր քաղաքական կարիերայում ձգտում է առավելագույնի»,- «Արմենպրես»-ի հաղորդմամբ, ասաց նա:

Անդրադառնալով ՀՀԿ-ական պատգամավոր Սամվել Նիկոյանի այն կանխատեսմանը, որ նոր ձևավորվող խորհրդարանը 1-2 տարվա կյանք կունենա, Հարությունյանը նշեց, որ հաջորդ ընտրությունները կանցկացվեն 2023 թվականին: