2 րոպեի ընթերցում
ԵՐԵՎԱՆ, 2 ՆՈՅԵՄԲԵՐԻ, ԱՐՄԵՆՊՐԵՍ: Հաջորդ տարվա պետական բյուջեի նախագծով կանխատեսվում է, որ ՀՀ արտաքին գործերի նախարարությունը պետական բյուջեից կօգտագործի 14.9 մլրդ դրամ:
«Արմենպրես»-ի հաղորդմամբ` նոյեմբերի 2-ին ԱԺ-ում 2019 թ. պետական բյուջեի նախագծի քննարկմանն այս մասին հայտարարեց ՀՀ ֆինանսների նախարարի պաշտոնակատար Ատոմ Ջանջուղազյանը:
«Ներկայացված բյուջեի նախագիծը պարունակում է այնպիսի տեղեկություն, որը պետք է թույլ տա դատողություններ անել նաև այն մասին, թե ֆինանսական միջոցների օգտագործմամբ ինչ արդյունքներ ենք ակնկալում:Կանխատեսվում է, որ ՀՀ արտաքին գործերի նախարարությունը 2019 թ. պետական բյուջեից կօգտագործի շուրջ 14.9 մլրդ դրամ միջոցներ: Դրանց հիմնական մասը՝ 69 տոկոսը կօգտագործվի օտարերկյա պետություններում և միջազգային կազմակերպություններում հավատարմագրված դիվանագիտական ծառայության մարմինների գործունեությունը կազմակերպելու համար: Պետական կառավարման գործառույթի իրականացման նպատակով կօգտագործվի 1. 8 մլրդ դրամ»,-ներկայացրեց Ջանջուղազյանը:
Միջազգային կազմակերպությունների անդամակցության գումարը կկազմի շուրջ 2.5 մլրդ դրամ կամ ԱԳՆ-ի կողմից իրականացվող ծրագրերի շուրջ 17 տոկոսը: Արարողակարգային ծառայությունների համար կնախատեսվի շուրջ 183 մլն դրամ: