Թուրքական կայքն անդրադարձել է Տրապիզոնի հայկական Սուրբ Ամենափրկիչ վանքին

ԵՐԵՎԱՆ, 9 ՀՈԿՏԵՄԲԵՐԻ, ԱՐՄԵՆՊՐԵՍ: Թուրքական karadenizgazete.com.tr կայքն անդրադարձել է Թուրքիայի Տրապիզոնի Օրթահիսար շրջանում գտնվող, միակ կանգուն մնացած հայկական վանքին՝ Սուրբ Ամենափրկչին:

Ինչպես հաղորդում է «Արմենպրես»-ը, կայքի փոխանցմամբ՝ վանքն այժմ գտնվում է փլուզման եզրին:

«Տրապիզոնում ժամանակին եղել է շուրջ 200 հայկական եկեղեցի և վանք, որոնցից ոչ մեկն այսօր կանգուն չէ, մի քանի վանքեր էլ որպես սեփականություն գտնվում են անհատների կալվածքների տարածքում»,-մեջբերում է կայքը պրոֆեսոր Իսմայիլ Քյոսեի խոսքերը:

Թուրք պրոֆեսորի պնդմամբ՝ վանքերն ու եկեղեցիները պետականացնելն ու պետական պահպանության տակ վերցնելը շատ կարևոր հանգամանք է, չնայած նրան, որ պահանջում է մեծ ֆինանսներ:

Թուրք պրոֆեսոր Իսմայիլ Քյոսեն Սևծովյան տեխնիկական համալսարանի միջազգային հարաբերությունների բաժնի դասախոս է:

Տրապիզոնի Սուրբ Ամենափրկիչ վանքը կառուցվել է 1424թ. Ստեփան Բաղդասարի կողմից:

Վանքի տարածքում պահպանվել են բազմաթիվ հայկական խաչքարեր: