1 րոպեի ընթերցում
ԵՐԵՎԱՆ, 13 ՀՈՒՆԻՍԻ, ԱՐՄԵՆՊՐԵՍ: Հայկական շախմատի առաջատար, աշխարհի գործող գավաթակիր Լևոն Արոնյանը մեկնարկեց «Grand Chess Tour»-ում:
«Արմենպրես»-ի հաղորդմամբ` կայացավ արագ շախմատի առաջին երեք տուրը: Արոնյանը մեկնարկային տուրում ոչ-ոքի խաղաց Ալեքսանդր Գրիշչուկի հետ, երկրորդում առավելության հասավ ԱՄՆ ներկայացուցիչ Հիկարու Նակամուրայի նկատմամբ, իսկ երրորդ տուրում` միավորը կիսեց աշխարհի նախկին չեմպիոն Վիշի Անանդի հետ:
3 տուրից հետո Արոնյանն ունի 4 միավոր և կիսում է 2-3-րդ տեղերը: Առաջատարը 5 միավորով Ուեսլի Սոն է:
Մասնակիցները 9 տուր կխաղան արագ շախմատ և 18 տուր՝ կայծակնային: Արագ շախմատում հաղթանակի համար տրվում է 2 միավոր, ոչ-ոքիի համար՝ 1, իսկ կայծակնային շախմատում հաղթանակի համար՝ 1 միավոր և ոչ-ոքիի՝ 0.5: Հունիսի 12-14-ը տեղի կունենան արագ շախմատի պարտիաները, հունիսի 15-ին և 16-ին՝ կայծակնային շախմատի պարտիաները: Մրցաշարին մասնակցում են Լևոն Արոնյանը, Ֆաբիանո Կարուանան, Շահրիյար Մամեդյարովը, Մաքսիմ Վաշիե-Լագրավը, Անիշ Գիրին, Սերգեյ Կարյակինը, Ուեսլի Սոն, Հիկարու Նակամուրան, Ալեքսանդր Գրիշչուկը և Վիշվանաթան Անանդը: