Արցախի, ցեղասպանության և ազգային հարցերում օրվա իշխանությունների կողքն ենք լինելու. Էդուարդ Շարմազանով
2 րոպեի ընթերցում
ԵՐԵՎԱՆ, 12 ՀՈՒՆԻՍԻ, ԱՐՄԵՆՊՐԵՍ: Հայաստանի հանրապետական կուսակցությունը կարողանում է ցույց տալ, թե ինչպիսին պետք է լինի պետականամետ ընդդիմությունը:
«Արմենպրես»-ի հաղորդմամբ՝ հունիսի 12-ին Պանթեոնում, Անդրանիկ Մարգարյանի ծննդյան օրվան նվիրված հիշատակի արարողությունից հետո, լրագրողների հետ զրույցում այս մասին ասաց ՀՀԿ մամուլի խոսնակ, ԱԺ փոխնախագահ Էդուարդ Շարմազանովը:
Նրա խոսքով՝իրենք երբեք անձնական վիրավորանքների դաշտ չեն մտնում և անձնական պայքար չեն մղում: «Արցախի, ցեղասպանության և ազգային հարցերում օրվա իշխանությունների կողքն ենք լինելու, որովհետև դա է պահանջում Հայաստանի Հանրապետության շահը: Դա է մեզ պատգամել Անդրանիկ Մարգարյանը՝ սիրել Հայաստանը ոչ թե խոսքով, այլ գործով»,-ասաց Շարմազանովը՝ հավելելով, որ ընդդիմություն լինես, թե իշխանություն, դու պարտավոր ես ծառայել քո հայրենիքին, ինչը և իրենք փորձելու են անել:
ՀՀԿ խոսնակը չբացառեց, որ թերություններ ևս կլինեն, բայց հավելեց, որ թերություններ կան այնտեղ, որտեղ կա աշխատանք: «Ամենակարևորն այն է, որ գլխավոր հարցերում մենք պետք է լինենք միասնական: Մեզ որևէ մեկը անկախ Հայաստան չի նվիրել, մեր պապերը, մեր ծնողները, այսօր մեր երիտասարդները ամեն օր պայքարում են անկախ Հայաստանի համար»,-հավելեց նա: