Թուրքիայում հայկական ծագում ունեցող իրավապաշտպան է կալանավորվել. Ազատության Ստոկհոլմի կենտրոն

ԵՐԵՎԱՆ, 21 ՄԱՅԻՍԻ, ԱՐՄԵՆՊՐԵՍ: Թուրքիայում դատարանը սոցիալական մեդիայում արած գրառման համար կալանավորել է իրավապաշտպան Ռոզերին Զերիին: Ինչպես հաղորդում է «Արմենպրես»-ը, այս մասին հայտնում է Ազատության Ստոկհոլմի կենտրոնը՝ նշելով, որ կալանավորվածը էթնիկ հայ է, նա մեղադրվում է «ահաբեկչական խմբավորման օգտին քարոզչություն իրականացնելու» մեջ:

Զերիին նախնական կալանքի ենթարկելու մասին թվիթերյան միկրոբլոգում հայտնել է 2016 թվականի հուլիսի ձախողված հեղաշրջումից հետո կառավարության որոշմամբ աշխատանքից ազատված պատմության ուսուցիչ Աջուր Քարադաղը՝ նշելով, որ մայիսի 18-ին նրան կալանավորել են թվիթերում արած գրառման պատճառով: «Նա հիվանդ երեխայի մայր է: Ի՞նչ հանցանք պետք է գործած լինի մեկ թվիթով: Նա անմեղ է: Ի՞նչ եք ուզում այդպիսով անել: Արդեն բավական է»,- նշել է նա:

Ռոզերին Զերին, ում ֆեյսբուքյան էջում գրված է, որ նա ծագումով Հայաստանից է, մշտապես ակտիվորեն գրառումներ է արել սոցիալական ցանցերում՝ քննադատելով Թուրքիայի իշխանությունների քաղաքականությունը: Հայտնի չէ, թե հստակ որ գրառումն է պատճառ դարձել նրա կալանավորման համար:

Թուրքիայում արդեն ավանդական գործելաոճ է դարձել քաղաքացիների ձերբակալելն ու կալանավորելը սոցիալական ցանցերում կառավարության գործելաոճի նկատմամբ իրենց բողոքը հայտնելու պատճառով: Մասնավորապես, միայն 2016 թվականին 1080 մարդը դատապարտվել է նախագահ Ռեջեփ Թայիփ Էրդողանի մասին գրառում անելու ու այդպիսով նախագահին «վիրավորելու» հիմնավորմամբ:

Հայտնի է նաև, որ 2016 թվականի վերջի տվյալներով՝ սոցցանցերում «ահաբեկչական քարոզչություն անելու կամ պետական պաշտոնյայի վիրավորելու» համար հետաքննություն է սկսվել առնվազն 10 հազար մարդու նկատմամբ:

Rozerin Zeri. Tweet paylaşımları gerekçe gösterilerek tutuklandı bugün. Çocuğu hasta olan bir anne. Rezillik bu. Bir insan tweetle nasıl bir suç işlemiş olabilir? Nedir bu telaşınız? Tertemiz bir kadın. Ne yapmak istiyorsunuz? Artık yeter be! pic.twitter.com/89ZgZ6nueQ

— Acun Karadağ (@acun_karadag) 18 мая 2018 г.