Հայաստանը զոհից վերածվել է առաջնորդողի և ցեղասպանությունները խստորեն մերժելու ազդակ է հնչեցնում. Վարդան Արամյան

ԵՐԵՎԱՆ, 24 ԱՊՐԻԼԻ, ԱՐՄԵՆՊՐԵՍ: Հայերը զոհից վերածվել են առաջնորդողի ու ամբողջ աշխարհում նման ցավալի երևույթները մերժելու ազդակ են հնչեցնում:«Արմենպրես»-ի փոխանցմամբ՝ լրագրողների հետ ճեպազրույցում ասաց ՀՀ ֆինանսների նախարարի պաշտոնակատար Վարդան Արամյանը:

«Հարյուրամյակի միջոցառումների շրջանում մենք սրբադասեցինք մեր նահատակներին, որոնք 1915 թվականին դարձան մարդկային չարիքի զոհ։ Այստեղ կա կարևոր խորհուրդ. 100-րդ տարելիցից հետո արդեն հարգանքի տուրքն ուղղված է սրբադասված նահատակների հիշատակին»,-ասաց նախարարի պաշտոնակատարը:

Նրա խոսքով՝ երկրորդ նշանակալի քայլն այն է, որ Հայաստանը ստանձնել է կարևոր դերակատարություն ամբողջ աշխարհում նման երևույթները խստորեն դատապարտելու հարցով: «Կրոնի և ազգային հիմքով չի կարելի ատելություն սերմանել ու բնաջնջել ժողովրդին աշխարհի երեսից»,-հավելեց Վարդան Արամյանը:

Օսմանյան կայսրության կողմից 1915 թվականին հայերի նկատմամբ իրականացված ոճրագործությունը 20-րդ դարասկզբի մեծագույն ոճրագործությունն է:Աշխարհասփյուռ հայությունը նշում է Հայոց ցեղասպանության 103-րդ տարելիցը: Հայ ժողովուրդը, երկրի բարձրաստիճան պաշտոնյաներն ու Հայաստան ժամանած հյուրերը ապրիլի 24-ին գալիս են Ծիծեռնակաբերդի բարձունք՝ հարգանքի տուրք մատուցելու Հայոց ցեղասպանության զոհերի հիշատակին: