388.33
Ադրբեջանում նախագահի ընտրություններն անց են կացվել լայնածավալ խախտումներով. ԵԱՀԿ հայտարարությունը
3 րոպեի ընթերցում
ԵՐԵՎԱՆ, 12 ԱՊՐԻԼԻ, ԱՐՄԵՆՊՐԵՍ: Ադրբեջանի արտահերթ նախագահական ընտրություններն անց են կացվել սահմանափակ քաղաքական միջավայրում, գործող այնպիսի օրենքների պայմաններում, որտեղ սահմանափակվում են այն հիմնարար իրավունքներն ու ազատությունները, որոնք անհրաժեշտ է իրական ժողովրդավարական ընտրությունների անցկացման համար: Ինչպես հաղորդում է «Արմենպրես»-ը, այս մասին ասվում է ընտրությունների արդյունքներով ԵԱՀԿ տարածած հաղորդագրության մեջ:
«Բազմակարծության` այդ թվում և լրատվամիջոցների շրջանում բացակայության պայմաններում ընտրությունների ընթացքում չի եղել իրական մրցակցություն: Մյուս թեկնածուները զերծ մնացին ուղղակիորեն մարտահրավեր նետելու կամ քննադատելու գործող նախագահին, տարբերակում չի եղել նրա քարոզարշավի ու պաշտոնական գործունեության միջև»,- ասվում է ԵԱՀԿ հայտարարության մեջ:
Կազմակերպությունն արձանագրել է, որ ընտրությունների օրը նկատվել են պարտադիր ընթացակարգերի լայնածավալ խախտումներ, թափանցիկության բացակայություն, բազմաթիվ լուրջ խախտումներ: Քվեաթերթիկների հաշվարկի ընթացքում մտադրված կերպով զեղծարարություններ են արվել:
ԵԱՀԿ-ը զեկույցում նշվում է, որ նախընտրական քարոզարշավի ընթացքում սահմանափակվել է հասարակության մասնակցությունը գործընթացներին: Իշխող «Ենի Ազերբայջան» կուսակցության քարոզարշավը լավ կազմակերպված էր, ապահովված անհրաժեշտ ռեսուրսներով, սակայն թեկնածուն անձամբ քարոզարշավը չէր իրականացնում, այլ այցելություններ էր կատարում և օտարերկրյա բարձրաստիճան հյուրերի ընդունում պաշտոնական՝ նախագահի կարգավիճակով: Մինչդեռ մյուս յոթ թեկնածուների քարոզարշավը եղել է մեծապես սահմանափակված:
«Մենք պետք է հաշվի առնենք, որ այնպիսի քաղաքական միջավայրում, որտեղ ժողովրդավարական սկզբունքները վարկաբեկված են և օրենքի գերակայությունը բացակայում է, արդար ու ազատ ընտրություններ անցկացնելն անհնարին է: Ընտրությունների օրը մենք գրանցել են մի շարք խախտումներ, սակայն չկա տարբերակ պարզելու, թե ինչպես են դրանք ազդել ընտրությունների արդյունքների վրա»,- նշել է Եվրախորհրդի խորհրդարանական վեհաժողովի պատվիրակության ղեկավար Վիորել Ռիսերդ Բադեան:
Ընտրություններում ԵԱՀԿ/ԺՀՄԻԳ-ի դիտորդական առաքելության ղեկավար Քորին Յոնկերն էլ ընդգծել է, որ գործնականում բացակայում էին այն հիմնարար իրավունքներն ու ազատությունները, որոնք անհրաժեշտ են ժողովրդավարական ընտրությունների համար: «Իշխանությունները պետք է կատարեն Ադրբեջանի պարտականությունները որպես ԵԱՀԿ մասնակից երկիր՝ հարգելու, պաշտպանելու և աջակցելու քաղաքացիների ժողովրդավարական իրավունքներին»,- ասել է նա:
