1 րոպեի ընթերցում
ԵՐԵՎԱՆ, 22 ՄԱՐՏԻ, ԱՐՄԵՆՊՐԵՍ: Հայաստանի ֆուտբոլի ազգային թիմի և Լոնդոնի «Արսենալ»-ի կիսապաշտպան Հենրիխ Մխիթարյանըհավատացնում է՝ Էստոնիայի և Լիտվայի դեմ առաջիկա խաղերի ընթացքում հավաքականն անելու է ամեն բան հաղթանակի համար: Այս մասին Հայաստանի 2017 թվականի լավագույն ֆուտբոլիստի մրցանակը ստանալիս «Արմենպրես»-ի հարցին ի պատասխան ասաց ֆուտբոլիստը՝ անդրադառնալով հավաքականում առկա տրամադրությանն ու սպասելիքներին:
«Տրամադրությունը միշտ բարձր է: Փորձելու ենք հաղթել այդ երկու խաղերում: Չնայած որ լինելու են մարտավարական փոփոխություններ, ֆուտբոլիստների փոփոխություններ, սակայն դա չպետք է ազդի հաղթանակի ցանկության վրա: Կփորձենք ուրախացնել մեր երկրպագուներին»,- ասաց Մխիթարյանը:
Նա անդրադարձավ նաև հավաքականի նորեկին՝ Նորբերտո Բրիասկո Բալեկյանին՝ ասելով. «Բալեկյանի մասին շատ լավ կարծիք ունեմ, շատ լավ է մերվում հավաքականի մարզումներին: Հուսով ենք՝ խաղերում շատ մեծ օգուտ կտա»:
Հայաստանի ֆուտբոլի ազգային հավաքականը մարտի 24-ին և 27-ին Երևանում ընկերական հանդիպումներ կունենա Էստոնիայի և Լիտվայի հետ: