Մարտի 1-ի զոհերից Սամվել Հարությունյանի՝ հրազենային վիրավորում ստանալու վերաբերյալ քննական մարմինը որևէ տվյալ չունի
2 րոպեի ընթերցում
ԵՐԵՎԱՆ, 23 ՓԵՏՐՎԱՐԻ, ԱՐՄԵՆՊՐԵՍ: Մարտի 1-ի զանգվածային անկարգությունների ընթացքում զոհված Սամվել Հարությունյանի՝ հրազենային վնասվածք ստանալու վերաբերյալ որևէ տեղեկություն քննական մարմինը չի ստացել: Ազգային ժողովում մարտի 1-ի իրադարձությունների վերաբերյալ խորհրդարանական լսումների ընթացքում այս մասին ասաց ՀՀ գլխավոր դատախազության հատկապես կարևոր գործերով քննության վարչության պետի տեղակալ Կարեն Բիշարյանը՝ պատասխանելով ՀՀԿ խմբակցության պատգամավոր Մարգարիտ Եսայանի հարցին: Մարգարիտ Եսայանը հիշեցրեց, որ մարտի 1-ից հետո համացանցում պտտվում էր մի տեսանյութ, որում պնդում էին, որ զոհերից Սամվել Հարությունյանը գնդակահարվել է: «Դատախազությունն այդ տեսանյութն ուսումնասիրե՞լ է, այդ վարկածը քննության առարկա դարձե՞լ է»,- հարցրեց պատգամավորը:
Կարեն Բիշարյանը պատասխանեց, որ քննության մարմինը Սամվել Հարությունյանի՝ հրազենային վիրավում ստանալու վերաբերյալ որևէ տվյալի չի տիրապետում: Մենք ունենք Սամվել Հարությունյանի դիակի դատաբժշկական փորձաքննության եզրակացությունը, որտեղ հստակ ֆիքսված է, որ նրա մահվան պատճառ է դարձել բութ և կոշտ գործիքների կիրառումը»,- «Արմենպրես»-ի հաղորդմամբ՝ նշեց Բիշարյանը:
Նա հավելեց, որ դատաբժշկական փորձաքննությունը հրազենային վիրավորում ստանալու վերաբերյալ հետևություն չի բովանդակում, հետևաբար իրենք նման վարկած առաջ քաշելու և քննության առարկա դարձնելու տվյալ չունեն: