ԵՐԵՎԱՆ, 26 ՀՈՒՆՎԱՐԻ, ԱՐՄԵՆՊՐԵՍ: Թուրքիայի խորհրդարանում ներկայացված քրդամետ Ժողովուրդների դեմոկրատական կուսակցության հայազգի պատգամավոր Կարո Փայլանը դեմ է արտահայտվել Աֆրինում թուրքական ԶՈւ կողմից իրականացվող «Ձիթենու ճյուղ» գործողությանը:
Այս մասին, ինչպես հաղորդում է «Արմենպրես»-ը, Կարո Փայլանը գրառում է կատարել իր թվիթերյան միկրոբլոկում:
«Պատերազմին կողմնակից անձինք նույնպես հանցակից են պատերազմին, ոչ ասեք Աֆրինի պատերազմին, այդ հանցագործությանը մասնակից մի եղեք»,- դիմելով հանրությանը կոչ է արել հայազգի պատգամավորը:
«Իշխանությունները փորձում են լռեցնել իրականությունն արտահայտող անձանց և խաղաղության կողմնակիցներին: Խաղաղություն ցանկանալը հանցանք չէ»,- հանրության ուշադրությունը հրավիրելով Աֆրինի դեպքերին դեմ արտահայտվող լրագրողական և մտավորական շրջանակների նկատմամբ իշխանությունների կողմից իրականացվող ճնշումների վրա հավելել է Կարո Փայլանը:
Թուրքիայի զինված ուժերըհունվարի 20-իցՍիրիայի Աֆրին շրջանում քրդերի դեմ ռազմական գործողություն են սկսել, որը ստացել է «Ձիթենու ճյուղ» անվանումը: Այդ օրը թուրքական 72 ռազմական ինքնաթիռ ռմբակոծել են քրդերի դիրքերը, ինչից հետո թուրք զինվորներն անցել են սիրիական սահմանը: Գործողություններին մասնակցում են զգալի թվով զինվորներ ու զինտեխնիկա: Թուրքական զինուժն Աֆրին նահանգ է մտել 3 ուղղությամբ: