Թուրքիայի ռազմական ինքնաթիռները զանգվածաբար խախտել են Հունաստանի օդային սահմանը

ԵՐԵՎԱՆ, 2 ՓԵՏՐՎԱՐԻ, ԱՐՄԵՆՊՐԵՍ: Հունաստանի պաշտպանության նախարարությունը հայտարարել է թուրքական ռազմական ինքնաթիռների կողմից Հունաստանի օդային տարածք զանգվածային ներխուժումներ իրականացնելու մասին: Ինչպես հաղորդում է «Արմենպրես»-ը, այս մասին հայտնում է Reuters գործակալությունը:

Պաշտպանության նախարարությունից հայտնել են, որ Էգեյան ծովի կենտրոնական և հարավային հատվածներում գրանցվել է խախտումների անսովոր բարձր ցուցանիշ` 138 խախտում:

Կատարվածը խստորեն դատապարտել է Հունաստանի պաշտպանության նախարար Պանոս Կամենոսը, ով Թուրքիայի գործողությունները որակել է որպես «կովբոյի վարքագիծ»: Նա նշել է, որ իրենք խաղաղություն են ցանկանում և կռիվ չեն փնտրում, սակայն չի լինի մի ինքնաթիռ, որի դիմացն իրենք չեն առնի:

Թուրքիայի և Հունաստանի միջև հարաբերությունները լարվել են այն բանից հետո, ինչ հունական կողմը վերջնականապես հրաժարվեց Անկարային հանձնել ուղղաթիռով փախած ութ թուրք զինվորականներին:Պաշտոնական Անկարան նրանց մեղադրում է Թուրքիայում ռազմական հեղաշրջման փորձին մասնակցելու մեջ: