367.79
Ն.Ս.Օ.Տ.Տ. Արամ Ա. Կաթողիկոսն ընդունել է Իրանի դեսպանին
1 րոպեի ընթերցում
ԵՐԵՎԱՆ, 9 ՀՈՒՆՎԱՐԻ, ԱՐՄԵՆՊՐԵՍ: Ն.Ս.Օ.Տ.Տ. Արամ Ա. Վեհափառ Հայրապետն ընդունել է Լիբանանում Իրանի Իսլամական Հանրապետության դեսպան Ֆաթըհ Մուհամմատ Ալիին: Ներկա են եղել դեսպանատան քաղաքական գրասենյակի ղեկավարը եւ աշխատակազմի այլ դիվանագետներ: Այս մասին «Արմենպրես»-ին տեղեկացրեցին Կիլիկիայի Հայոց Կաթողկոսարանից:
Խորհրդակցությանն անդրադարձ է եղել Միջին Արեւելքի վերջին քաղաքական զարգացումներին եւ Իրանի ու Սաուդյան Արաբիայի միջև առկա լարվածությանը: Դեսպանը վեհափառին ներկայացրել է ստեղծված իրավիճակի պատճառները եւ Իրանի դիրքորոշումը: Արամ Ա. Կաթողիկոսն իր մտահոգությունն է հայտնել և նշել, որ պետք է լուծում գտնել շրջանը վտանգավոր բևեռացումներից հեռու պահելու համար: Քննարկման ընթացքում խոսվել է նաև Լիբանանի ներկա իրավիճակին վերաբերող հարցերին: Բացի դրանից, անդրադարձ է եղել Իրանի հայ համայնքին եւ այդ համատեքստում Արամ Ա Կաթողիկոսն իր գոհունակությունն է հայտնել Իրանի հայությանը ցուցաբերած հատուկ հոգածության վերաբերյալ: Վեհափառ Հայրապետը նաեւ ողջունել է Ամանորին եւ Սուրբ Ծննդյան տոներին Իրանի հոգևոր առաջնորդ Այաթոլլահ Ալի Խամենեի այցելությունը նահատակ իրանահայ զինվորների ընտանիքներին:
Բաժանորդագրվեք մեր ալիքին Telegram-ում