2 րոպեի ընթերցում
ԵՐԵՎԱՆ, 22 ՀՈԿՏԵՄԲԵՐԻ, ԱՐՄԵՆՊՐԵՍ: Ն.Ս.Օ.Տ.Տ. Արամ Ա կաթողիկոսն Աթենքում տեղի ունեցած միջազգային համաժողովում հանդես է եկել ելույթով:
Այս մասին «Արմենպրես»-ը տեղեկացավ Կիլիկիո կաթողիկոսության պաշտոնական կայքից: «Միջին Արևելքն այսօր վերստին դարձել է տագնապներով լեցուն մի շրջան: Տագնապներ, որոնք հրահրվում են արտաքին ուժերի կողմից` ի շահ իրենց աշխարհաքաղաքական ծրագրերի: Այս տագնապներն ամբողջական ու մնայուն լուծում կարող են գտնել միայն քաղաքական գործընթացով` մասնակցությամբ տեղական ուժերի և ելնելով քրիստոնյա-իսլամ գոյակցությունն ամուր պահող հանձնառությունից»,- նշել է Արամ Ա-ն:
«Միջին Արևելքում կրոնական ու մշակութային բազմազանության խաղաղ գոյակցությունը» խորագրով համաժողովը կազմակերպվել էր Հունաստանի ԱԳ նախարարության կողմից, որին մասնակցել են շուրջ երկու հարյուր ներկայացուցիչներ` պատրիարքներ, հոգևոր առաջնորդներ, արտգործնախարարներ, դեսպաններ, միջազգային կազմակերպությունների ներկայացուցիչներ:
Համագումարի բացումը կատարել է հանրապետության նախագահը, որին իր ելույթով հաջորդել է արտգործնախարարը:
Վեհափառ Հայրապետն իր խոսքում շեշտել է մի քանի կետ` նշելով, որ արտաքին միջամտությունները ձախողեցին շրջանի տագնապների լուծմանն առաջնորդող միջոցներ գտնելուն: Ներքին իսլամական հակամարտություններն ավելի սրեցին դրանք լուծելու ուղիները: Ծայրահեղականությունը դարձել է շրջանի տագնապների գլխավոր պատճառներից մեկը:
Իր խոսքի ավարտին նա հիշեցրել է, որ Միջին Արևելքի յուրահատուկ հարստություններից մեկը եղել է բազմազանությունը, հետևաբար այն պետք է ամեն գնով պահպանել: