2 րոպեի ընթերցում
ԵՐԵՎԱՆ, 21 ՕԳՈՍՏՈՍԻ, ԱՐՄԵՆՊՐԵՍ: Ամերիկուհի Ջենիֆեր Լոուրենսն աշխարհի ամենաբարձր վարձատրվող դերասանուհին է ճանաչվել Forbes-ի վարկածով: Վերջին 12 ամսվա ընթացքում 25-ամյա Լոուրենսը վաստակել է 52 մլն դոլար, տեղեկացնում է «Արմենպրես»-ը:
15,6 մլն դոլար պակաս է վաստակել երկրորդ տեղը գրաված եւս մեկ ամերիկուհի՝ Սքարլեթ Յոհանսոնը (35,5 մլն դոլար): Երրորդ տեղում «Լրտեսը» կինոնկարի աստղ Մելիսա Մաքքարթին է , որը վաստակել է 23 մլն դոլար:
Ինչպես նշում է Forbes-ը, Ջենիֆեր Լոուրենսին հիմնական եկամուտը բերում են նկարահանումները «Քաղցած խաղեր» եռերգությունում: 2015 թվականին թողարկվելու Է «Ջոյ» ֆիլմը, որում նա գլխավոր դերն է խաղացել: Բացի այդ, դերասանուհու բանկային հաշիվը նկատելիորեն համալրվել է Dior-ի հետ կնքված պարտավորագրի շնորհիվ:
Վարկանիշի միակ ոչ ամերիկուհին է դարձել չինուհի Ֆան Բինբինը, որը գլխավոր դերն է խաղացել «Շիկահեր հարսնացուն Լուսնային Թագավորությունից» ֆիլմում: Վերջին 12 ամսում նա վաստակել է 21 մլն դոլար:
Հինգերորդ տեղում Ջենիֆեր Էնիսթոնն է (16,5 մլն դոլար), վեցերորդում՝ Ջուլիա Ռոբերթսը (16 մլն դոլար), յոթերորդում՝ Անջելինա Ջոլին, որը հորիզոնականը կիսում է Ռիզ Ուիզերսփունի հետ (15 մլն դոլար):
Ընդհանուր առմամբ աշխարհի ամենաբարձր վարձատրվող դերասանուհիների ցուցակի 18 մասնակիցները տարվա ընթացքում վաստակել են 281 մլն դոլար՝ չհաշված հարկերը: Ինչպես նշում է Forbes-ը, աշխարհի ամենաբարձր վարձատրվող դերասանների վարկանիշի մասնակիցների եկամուտը (ցուցակում նրանք 34-ն են) նույն այդ ժամանակաշրջանում կազմել է 941 մլն դոլար:
Միայն չորս դերասանուհիներ են վաստակել ավելի քան 20 մլն դոլար, մինչդեռ դերասանների թվում այպիսիք արդեն 21-ն են: Forbes-ի «կանանց» վարկանիշում տեղ գրավելու համար հարկավոր էր վաստակել առնվազն 6 մլն դոլար, «տղամարդկանց տարբերակում» ներառել են առնվազն 13 մլն դոլար վաստակածներին, հաղորդել Է «Ինտերֆաքս»-ը:
Լուսանկարը` REUTERS