1 րոպեի ընթերցում
ԵՐԵՎԱՆ, 14 ՀՈՒԼԻՍԻ, ԱՐՄԵՆՊՐԵՍ: Ֆուտբոլի Գերմանիայի ազգային թիմի անդամ Բաստիան Շվայնշտայգերը պատմել է այն մասին, թե ինչու է որոշել հեռանալ «Բավարիա»-ից:
«Ես շատ լավ կարիերա եմ ունեցել «Բավարիա»-ում, բայց «Մանչեստեր Յունայթեդ»-ը միակ ակումբն է, որի համար ես կլքեի Մյունխենը: Ես պատրաստ եմ ընդունել այս մարտահրավերը: Ուրախ եմ, որ կրկին աշխատելու եմ Լուի վան Գալի գլխավորությամբ և ուզում եմ որ «Մանչեստեր»-ը լավագույնը լինի աշխարհի ամենամրցունակ առաջնությունում»,-«Արմենպրես»-ի հաղորդմամբ, Շվայշտայգերի խոսքերը մեջ են բերում անգլիական ԶԼՄ-ները:
Աշխարհի չեմպիոնը, 17 տարի լինելով Մյունխենի «Բավարիա»-ի առաջատար ֆուտբոլիստներից մեկը, երեք տարվա պայմանագիր է կնքել անգլիական «Մանչեստեր Յունայթեդ»-ի հետ: Շվայնշտայգերը մեկ անգամ դարձել է Չեմպիոնների լիգայի գավաթակիր, 8 անգամ տիրացել է Գերմանիայի չեմպիոնի տիտղոսին և 7 անգամ էլ երկրի գավաթին: