2 րոպեի ընթերցում
ԵՐԵՎԱՆ, 19 ՀՈՒՆԻՍԻ, ԱՐՄԵՆՊՐԵՍ: Թուրքիայի քեմալական Հանրապետական ժողովրդական կուսակցության ղեկավար Քեմալ Քըլըչդարօղլուն երկրում կոալիցիոն կառավարություն կազմելու վերաբերյալ նոր հայտարարություն է արել: Ինչպես հաղորդում է «Արմենպրես»-ը` վկայակոչելով թուրքական «Հուրիեթ» պարբերականը, Քըլըչդարօղլուն նախքան կոալիցիա կազմելու շուրջ պաշտոնական բանակցությունների մեկնարկն առաջարկել է կազմել ընդդիմադիր երեք կուսակցություններից բաղկացած կոալիցիա, որտեղ վարչապետի պաշտոնը կզբաղեցնի «Ազգայնական շարժում» կուսակցության ղեկավար Դևլեթ Բահչելին:
Լրագրողներից մեկի այն հարցին, թե ինչպես են պատրաստվում կոալիցիայի մեջ ներառել քրդական Ժողովուրդների դեմոկրատական կուսակցությանը, եթե ազգայնականները ծայրահեղական դիրքորոշում ունեն թուրք-քրդական հաշտեցման գործընթացի վերաբերյալ, Քըլըչդարօղլուն ասել է. «Թուրքիան աշխարհի չափ խնդիրներ ունի, որոնք կարգավորման կարիք ունեն: Քաղաքականության արվեստն այդ խնդիրների լուծումը գտնելն է»:
Հունիսի 7-ին Թուրքիայում տեղի ունեցած խորհրդարանական ընտրությունների արդյունքներով իշխող «Արդարություն և զարգացում» կուսակցությունը չէր կարողացել հավաքել այնքան ձայն, որպեսզի կազմեր միակուսակցական կառավարություն: Ներկայում ԱԶԿ-ին անհրաժեշտ է համագործակցել ընտրված մյուս կուսակցությունների ներկայացուցիչների հետ՝ կոալիցիա կազմելու համար, սակայն վերջինները նախապես հայտարարել են, որ իշխող քաղաքական ուժի հետ միավորվելու մտադրություն չունեն: Եթե ընտրությունների ավարտից 45 օր անց կառավարություն չկազմվի, ապա երկրում կանցկացվեն վաղաժամ խորհրդարանական ընտրություններ: