2 րոպեի ընթերցում
ԵՐԵՎԱՆ, 16 ՀՈՒՆԻՍԻ, ԱՐՄԵՆՊՐԵՍ: Սիրիական բանակը լիբանանյան «Հըզբոլլահի» հետ վերահսկողություն է հաստատել Կալամունի շրջանի Ջարաջիրի բարձունքներում գտնվող Ռաս ալ Կուշ, Կարնա Ռաս աս Սաբա վայրերի վրա` ոչնչացնելով ահաբեկիչների վերջին թաքստոցները: Ինչպես հաղորդում է «Արմենպրես»-ը` վկայակոչելով սիրիական ՍԱՆԱ գործակալությունը, ռազմական աղբյուրների տեղեկացմամբ՝ սիրիական բանակը ստորաբաժանումը Լաթաքաիայի հյուսիսում ոչնչացրել է «Ջաբհա ան Նուսրա» խմբավորման ղեկավարներից մեկին:
Դամասկոսի բնակելի թաղամասերում ահաբեկչական հարձակման հետևանքով մեկ զոհ և յոթ վիրավոր է արձանագրվել: Տասը հրասանդներ ընկել են Մզզե, Մասաքին Բրզե, Մազրաա, Հադիկա ալ Ջահիզ թաղամասերում: Բացի մարդկային վնասներից, ահաբեկչական հարձակումների հետևանքով տներ, մեքենաներ, խանութներ են վնասնվել:
Ավելի վաղ` հունիսի 12-ին, սիրիական բանակը և «Հըզբոլլահը» վերահսկողություն էին հաստատել Ջարաջիրի բարձունքներում Կարնա Շաաբ ան Նուսուբ, Աբու Հարբ և Կարնա Սամաան տեղանքների վրա: Մինչ այդ համատեղ ուժերով ազատագրվել էին Թամսեթ ուադի Ահմար, Քըրնեթ ուադի Ահմար շրջանները Ջարաջիրի բարձունքներում:
Բանակը «Հըզբոլլահի» հետ վերջին շրջանում լուրջ վնասներ է հասցնում ահաբեկչական խմբավորումներին` ազատագրելով տարածքներ սիրիա-լիբանանյան սահմանին: