367.79
Արամ Ա-ն պարգևատրել է ՀՀ-ում ԱՄՆ-ի նախկին դեսպան Ջոն Էվանսին
2 րոպեի ընթերցում
ԵՐԵՎԱՆ, 29 ՄԱՅԻՍԻ, ԱՐՄԵՆՊՐԵՍ: Ընդառաջելով Արևելյան և Արևմտյան թեմերի առաջնորդ սրբազաններին և Ամերիկայի Հայ դատի գրասենյակին` Ն.Ս.Օ.Տ.Տ Արամ Ա կաթողիկոսը մայիսի 28-ին Բոստոնում Մեծի Տանն Կիլիկիո կաթողիկոսության «Ասպետ» շքանշանով պարգևատրել է ՀՀ-ում ԱՄՆ-ի նախկին դեսպան Ջոն Էվանսին, ով տասը տարի առաջ, անսալով մարդկային իրավունքների պաշտպանության արժեքների իր ներքին ձայնին, հայտարարել էր Հայոց ցեղասպանության իրողությունը, քայլ, որի պատճառով իր դիվանագիտական գործունեությունը վերջ էր գտել: Այս մասին «Արմենպրես»-ը տեղեկացավ Կիլիկիո կաթողիկոսության պաշտոնական կայքից:
Շրջանի ընդհանուր ոստիկանապետ Փիթր Քյությջյանը, ներկայացնելով դեսպան Էվանսին, նրան որակել է նոր օրերի Հենրի Մորգենթաու, ով իր ձայնը քաջաբար բարձրացրել էր հանուն արդարության: Նախկին դեսպանը պատգևատրվելուց հետո իր երախտագիտությունն է հայտնել Վեհափառ Հայրապետին ու հայ ժողովրդին՝ իրեն ընձեռած պատվի համար:
Նորին Սրբությունը, խոսքն ուղղելով նրան, նշել է. «Պարոն դեսպան, դուք քաջություն եք ունեցել ճշմարտությունը բարձրաձայն, հստակ ու հրապարակային ասելու: Աշխարհի վրա ոչ մի ուժ չի կարող ճշմարտությունը ծածկել. քաղաքական և դիվանագիտական ուժերը կփորձեն այս կամ այն պատճառով շուքի տակ առնել ճշմարտությունը, սակայն չկա ուժ, որ կարողանա ճշմարտությունը եղծել: Դուք ճշմարտությունն ասացիք, գրավեցիք ամբողջ հայ ժողովրդի սիրտը և օրինակ հանդիսացաք ու դարձաք ճշմարտության դեսպանը»:
Բաժանորդագրվեք մեր ալիքին Telegram-ում