1 րոպեի ընթերցում
ԵՐԵՎԱՆ, 21 ՄԱՅԻՍԻ, ԱՐՄԵՆՊՐԵՍ: Դամասկոսի Մազրաա բնակելի թաղամասում, Հարասթա արվարձանում և Ուաֆիդին ճամբարում մայիսի 21-ին հրասանդներ են ընկել: Ինչպես հաղորդում է «Արմենպրես»-ը` վկայակոչելով սիրիական ՍԱՆԱ գործակալությունը, հրասանդներ ընկնելու հետևանքով մեկ զոհ և ութ վիրավոր է գրանցվել, նյութական վնասներ են կրել մերձակայքում գտնվող տներ, մեքենաներ և խանութներ:
Ահաբեկչական խմբավորումները ռմբակոծել են նաև Դարաա քաղաքը:
Մի քանի հրասանդներ ընկել են Հալեպի Աշրաֆիե բնակելի թաղամասում, ինչի հետևանքով երկու զոհ է գրանցվել, 17 մարդ վիրավորվել է:
Աղբյուրի տեղեկացմամբ՝ սիրիական բանակը Դարաայի և Կունեյտրայի գյուղերում «Ջաբհա ան Նուսրա» խմբավորմանը լուրջ վնասներ է հասցրել: Ահաբեկիչների «որջեր» են ոչնչացվել Հալեպի Քարամ Կատրանջի թաղամասում:
Տեղեկություններ կան, որ քրդական ուժերը «Իսլամական պետությունից» ազատագրել են Հասաքեի մարզի գրեթե բոլոր ասորական գյուղերը:
Սիրիական բանակն արդեն չորս տարի անընդմեջ պայքար է մղում տասնյակ զինված խմբավորումների դեմ՝ փորձելով երկրում վերականգնել կայունությունն ու անվտանգությունը: Բախումների զոհ է դարձել ավելի քան 220 հազար մարդ: