1 րոպեի ընթերցում
ԵՐԵՎԱՆ, 12 ՄԱՅԻՍԻ, ԱՐՄԵՆՊՐԵՍ: Սիրիական բանակը վերահսկողություն է հաստատել Հասաքեի մարզի երկու բնակավայրերի վրա՝ ոչնչացնելով տասնյակ ահաբեկիչների: Ինչպես հաղորդում է «Արմենպրես»-ը՝ վկայակոչելով սիրիական ՍԱՆԱ գործակալությունը, ռազմական աղբյուրների տեղեկացմամբ՝ բանակն ազգային պաշտպանական ջոկատների հետ մի շարք գործողություններ է իրականացրել «Իսլամական պետության» ահաբեկիչների դեմ՝ ազատագրելով Ռաֆռաֆ և Մաֆրակ աս Սիդիկ բնակավայրերը: Առգրավել են ահաբեկիչներին պատկանող զենքերը:
Ավելի վաղ տեղեկություններ էին ստացվել, որ բանակը Հասաքեի մարզում մի շարք կարևոր կետեր ու գյուղեր է ազատագրել:
Հալեպի մարզի Ջիսր Հաջ շրջանում ռազմական գործողություններ արդյունքում տասնյակ ահաբեկիչներ են սպանվել: Հալեպի Բաբ Նեյրաբ, Բուսթան ալ Կասր, Հանանու, Լիրմուն և այլ թաղամասերում ահաբեկիչների թաքստոցներ են ոչնչացվել:
Հոմս քաղաքի Ազ Զահրա շրջանի Ալ Ահրամ փողոցում ահաբեկչության հետևանքով չորս մարդ է զոհվել: Պայթյուններից մեկը որոտացել է Ալ Ահրամ, իսկ երկրորդը՝ աս Սիթթին փողոցում:
Սիրիական բանակն արդեն չորս տարի անընդմեջ պայքար է մղում տասնյակ զինված խմբավորումների դեմ՝ փորձելով երկրում վերականգնել կայունությունն ու անվտանգությունը: