Սիրիական բանակը և «Հըզբոլլահը» հսկողություն են հաստատել Ջուրուդ Ասալ ալ Ուարդ բարձունքների վրա
1 րոպեի ընթերցում
ԵՐԵՎԱՆ, 7 ՄԱՅԻՍԻ, ԱՐՄԵՆՊՐԵՍ: Սիրիական բանակը լիբանանյան «Հըզբոլլահի» անդամների հետ մայիսի 7-ին ամբողջովին հսկողություն է հաստատել սիրիա-լիբանանյան սահմանի մերձակայքում գտնվող Ջուրուդ Ասալ ալ Ուարդ բարձունքների վրա: Ինչպես հաղորդում է «Արմենպրես»-ը՝ վկայակոչելով արաբական լրատվամիջոցները, սիրիական բանակը «Հըզբոլլահի» հետ հարձակում է իրականացրել Ջուրուդ Ասալի վրա՝ հսկողություն հաստատելով զինյալների դիրքերի վրա: Բախումների արդյունքում տասնյակ զինյալներ են սպանվել և վիրավորվել, այդ թվում՝ սպանվել է «Ջաբհա ան Նուսրա» խմբավորման ղեկավարը:
Բացի այդ, թեժ բախումներ են ընթացել սիրիա-լիբանանյան սահմանին գտնվող Մասնաա շրջանի մերձակայքում: Բախումների ժամանակ ծանր զենքեր են օգտագործվել, ռազմական գործողությունները շարունակվել են մինչև լուսաբաց: Սիրիական բանակը հսկողություն է հաստատել Կալամունի ռազմավարական կարևոր նշանակություն ունեցող Կարնա բարձունքի վրա:
Սիրիական բանակի իրականացրած պայթյունից Սուեյդա մարզում զինված խմբավորման 30 զինյալներ են սպանվել:
Սիրիական բանակն արդեն չորս տարի անընդմեջ պայքար է մղում տասնյակ զինված խմբավորումների դեմ՝ փորձելով երկրում վերականգնել կայունությունն ու անվտանգությունը: