Հայաստանը մշտապես հանդես է եկել որպես ցեղասպանության և մարդկության դեմ հանցագործությունների կանխարգելման ջատագով
2 րոպեի ընթերցում
ԵՐԵՎԱՆ, 19 ՄԱՐՏԻ, ԱՐՄԵՆՊՐԵՍ: Հայաստանը մշտապես հանդես է եկել որպես ցեղասպանության և մարդկության դեմ այլ հանցագործությունների կանխարգելման միջազգային ջանքերի լուրջ ջատագով: ԵՄ-Հայաստան խորհրդարանական համագործակցության հանձնաժողովի 15-րդ նիստում այս մասին նշեց ՀՀ արտաքին գործերի նախարարի տեղակալ Կարեն Նազարյանը: «Մի քանի որ առաջ Եվրոպական խորհրդարանն ամենամյա զեկույց ընդունեց մարդու իրավունքների և ժողովրդավարության վերաբերյալ, որում Հայոց ցեղասպանության 100-րդ տարելիցի նախաշեմին ԵՄ անդամ բոլոր երկրներին և եվրոպական կառույցներին կոչ արեց ճանաչել Հայոց ցեղասպանությունը և շարունակել նպաստել Ցեղասպանության ճանաչմանը: Այսպիսով, Եվրոպական խորհրդարանը վերահաստատում է իր դիրքորոշումը Հայոց ցեղասպանության վերաբերյալ և վերահաստատում է, որ Ցեղասպանությունը և դրա ժխտումը մարդու իրավունքների բուն և հրատապ խնդիրներ են: Մենք երախտապարտ ենք հայ ժողովրդի նկատմամբ եվրոպական համերաշխության այս ուղերձի համար»,- «Արմենպրես»-ի հաղորդմամբ՝ նշեց Նազարյանը:
Նա հիշեցրեց, որ Եվրոպական խորհրդարանի ընդունած զեկույցում խոսվում է Մերձավոր Արևելքում կրոնական փոքրամասնությունների վիճակի մասին: «Զեկույցում խորհրդարանը Եվրամիության անդամ երկրներին կոչ է անում ապահովել կրոնական փոքրմասնությունների նկատմամբ հարգանքը, հատկապես, Մերձավոր Արևելքում, որտեղ քրիստոնյաները, այդ թվում՝ հայերը, ինչպես նաև եզդիները, հալածվում են ԻՊ-ի կամ ահաբեկչական այլ խմբերի կողմից»,- ընդգծեց փոխնախարարը:
Կարեն Նազարյանն անդրադարձավ նաև ահաբեկիչների կողմից սիրիական Դեր Զոր քաղաքի Սուրբ Նահատակաց հայկական եկեղեցու ոչնչացմանը՝ ընդգծելով, որ այդպիսով ուղիղ կապ անցկացվեց մարդկության դեմ անցյալի և ներկայի հանցագործությունների միջև: «Մշակութային ժառանգությունը ոչնչացնելու քայլը փորձ է ջնջել այլ ժողովուրդների հիշողությունը և ոչնչացնելու հազարամյակների պատմություն ունեցող մշակույթը և քաղաքակրթությունը»,- եզրափակեց փոխնախարարը: