1 րոպեի ընթերցում
ԵՐԵՎԱՆ, 17 ՄԱՐՏԻ, ԱՐՄԵՆՊՐԵՍ: Հայաստանի զարգացման հիմնադրամը տեղական զբոսաշրջային ընկերությունների հետ ներկայացնելու է Հայաստանը Ռուսաստանի Դաշնության մայրաքաղաք Մոսկվայում կայանալիք MITT միջազգային զբոսաշրջային ցուցահանդեսին: Այն կկայանա մարտի 18-21-ը` 203 երկրների 2 հազար 56 ընկերություններւ մասնակցությամբ:
Ինչպես «Արմենպրես»-ին հայտնեցին Հայաստանի զարգացման հիմնադրամից, ցուցահանդեսի ընթացքում կներկայացվեն Հայաստանի զբոսաշրջային արդյունքները, պատմամշակութային և քրիստոնեական հարուստ ժառանգությունը` ամրապնդելու և խթանելու համար Հայաստանի, որպես գրավիչ զբոսաշրջային երկրի, կայուն զարգացող վարկանիշը:
Ցուցահանդեսը նաև մասնավոր հատվածի հարթակ է` գործարար կապերի հաստատման, նոր պայմանագրերի կնքման և ներգնա զբոսաշրջության ծավալների խթանման համար:
Ռուսաստանի տուրիստական շուկան Հայաստանի զարգացման հիմնադրամի զբոսաշրջության խթանման թիրախային ուղղություններից է: Այս համատեքստում Հայաստանի մասնակցության նպատակն է առավելագույնս իրացնել զբոսաշրջային ոլորտում առկա հայ-ռուսական համագործակցության մեծ ներուժը: